HEADLINE, JUSTISA

PCIC detein timoroan ida lori osan falsu hosi Inglaterra

PCIC detein timoroan ida lori osan falsu hosi Inglaterra

PCIC detein sidadaun timoroan ida ho inisiál MG tinan (30), ne’ebé komete kazu lori osan falsu hosi Inglaterra mai Timor-Leste. Imajen/Natalino Costa

DILI, 25 Jullu 2022 (TATOLI)— Polísia Siéntífika Investigasaun Kriminál Nasionál (PCIC, sigla Portugés), segunda ne’e, detein sidadaun timoroan ida ho inisiál MG tinan (30), ne’ebé komete kazu lori osan falsu hosi Inglaterra mai Timor-Leste.

Portavóz PCIC, Octavio Araújo, informa, ekipa PCIC halo detensaun fragante delitu, tanba deteta susupeitu MG lori osan Dolár Amérikanu (USD) falsu hamutuk tahan 62, ne’ebé kada osan tahan ida ho valór $100, nune’e montante hamutuk $1.600.

CIC detein sidadaun timoroan ida ho inisiál MG tinan (30), ne’ebé komete kazu lori osan falsu hosi Inglaterra mai Timor-Leste. Imajen/Natalino Costa

“Ita nia ekipa PCIC halo detesaun fragante delitu de’it ba suspeitu MG, tanba suspeitu refere halo pasajen ba osan falsu ka lori osan falsu. Ita foin deteta osan $100, hamutuk tahan 17 maka falsu no restante ita nia ekipa espesialista PCIC ba osan falsu nian sei halo teste hodi hatene”, Portavoz PCIC ne’e hateten ba jornalista sira liuhosi konferénsia imprensa ne’ebé halo iha edifisiu PCIC, Caicoli, Segunda ne’e.

Nia afirma suspeitu MG lori osan falsu hirak ne’e mai Timor-Leste, bainhira fila hosi Inglaterra iha loron 21 fulan-jullu ne’e.

“Osan sira ne’e suspeitu lori hosi Inglaterra mai, bainhira suspeitu atu halo transaksaun iha Banku Nasionál Komérsiu Timor-Leste (BNCTL,sigla Portugés), maka ekipa PCIC deteta hodi halo detensaun ba nia,” Portavóz ne’e esplika.

Haree ba suspeitu nia hahalok ne’e Viola kona-ba lei krime pasajen moeda ne’ebé previstu iha artigu 308 hosi kódigu penál Timor-Leste.

Ho nune’e, PCIC halo kedan auto notisia ba Ministériu Públiku hodi detein suspeitu MG, durante oras 72 nia laran molok submete ba interrogatóriu dahuluk iha Tribunál Distritál Dili (TDD).

“Daudaun ne’e, suspeitu detein ona iha sela detensaun PCIC”, nia afirma.

Atu prevene osan falsu ne’e labele sekula iha territóriu laran, Portavóz PCIC ne’e hateten koordena ona ho BNCTL hodi prevene sirkulasaun osan falsu ne’e

“Hafoin ita halo detesaun ba suspeitu ita mós halo medida prevensaun ba iha fatin sira ne’ebé suspeitu ba hanesan loja tanba tanba tuir informasaun katak suspeitu  hola ona motór ida”, Nia informa.

Jornalista : Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!