BAUCAU, 25 jullu 2022 (TATOLI) – Komandu Polísia Nasionál Timor-Leste (PNTL) munisípiu Baucau realiza atividade sosiál no sensibiliza dekretu-lei númeru 6/2003, 6 abríl kona-ba Kódigu Estrada ho objetu hakbesik ba komunidade nia leet.
Komandante PNTL Munisípiu Baucau, Superintendente António de Sá, esplika, atividade refere komposta hosi polísia prosimilidade no vizibilidade iha involvementu profisionál ne’ebé realiza kada semana iha loron sesta-feira.
PNTL Baucau iha sesta, 22 jullu hala’o atividade rua hanesan aterru dalan iha fatin turizmu Wani-uma, suku Kaibada, postu administrativu Baucau Vila no kontinua marsa saudável.
“Hatudu ba komunidade katak polísia ne’e imi-nian, polísia kontinua halo kna’ar to’o área remota sira atu fó hanoin ba komunidade sira,” Komandante PNTL Baucau hatete iha Vila Nova, segunda ne’e.
Inisiativa refere hala’o tanba asesu estrada ba fatin turizmu tasi iha Wani-uma kondisaun aat nune’e difikulta turista lokál no estranjeiru sira atu asesu ho transporte ba fatin destinasaun.
Remata aterru dalan, komandu PNTL Baucau kontinua ho atividade marsa saudável hosi área Waini-uma to’o komandu Baucau, Vila Nova purvolta kilómentru 20 ho objetivu atu hasa’e fíziku, morál no mentalidade liuhosi ezersísiu ba membru sira nune’e bele preparadu atua situasaun iha komunidade.
António de Sá argumenta, atividade refere hanesan orijen serbisu PNTL nian nune’e aproveita hala’o sensibilizasaun ba motorista sira kona-ba movimentu roduviáriu.
PNTL iha devér atu sensibiliza dekretu-lei kódigu estrada liuliu iha área remota tanba maioria la utiliza fasilidade seguransa hanesan kapasete entaun númeru asidente tráfegu aumenta. Nune’e mós kondisaun estrada ne’ebé aat difikulta movimentasaun transporte públiku.
Jornalista : Natalino Belo
Editór : Evaristo Soares Martins
