SASCAS-CCLN selebra akordu apoiu grupu veteranu 0-3 no 4-7
DILI, 25 jullu 2022 (TATOLI)—Servisu Apoiu Sosiedade Sivil no Auditoria Sosiál (SASCAS, sigla portugés) no Konsellu Kombatente Libertasaun Nasionál (CCLN, sigla portugés), segunda ne’e, asina akordu fó apoiu ba grupu veteranu grau 0-3 no 4-7.
Notísia Relevante: SASCAS no CCLN selebra akordu tau-matan ba grupu veteranu
“Ohin ne’e, marka tan istória foun ida ba Servisu Apoiu Sosiedade Sivil no Auditoria Sosiál ne’ebé tutela mós servisu ida ba apoiu grupu veteran hosi CCLN, hosi nia membru 12 munisípiu inkliu RAEOA, ho orsamentu provolta $500.000.00.” Diretór Ezekutivu Servisu Apoiu Sosiedade Sivil no Auditoria Sosiál (SASCAS, sigla portugés), Duarte Soares Noronha, hateten ba jornalista sira iha Palásiu Governu, Díli, segunda ne’e.
Montante orsamentu $500.000.00 ne’e ho objetivu atu apoiu ba membru sira hosi CCLN iha 12 munisípiu, inklui RAEOA ba grau 0-3 to’o 4-7, ba sira-ne’ebé lahetan biban tratamentu espesiál ba hetan pensaun hanesan veteranu.
“Apoiu ida-ne’e ho objetivu atu apoiu ba atividade rua, atividade ekonomiku no edukasaun,” nia dehan.
Maske nune’e, nia dehan, atividade edukasaun ne’e atu apoiu ba membru CCLN nia oan sira ne’ebé antes atu tama universidade no sira-ne’ebé atu ramata universidade, hosi ne’e kada munisípiu ho ema 20 ne’ebé atu hetan benefisiu ba apoiu subsídiu edukasaun.
“Ba atividade ekonomia nian, depende ba ida-idak nia atividade balun halo atividade hortikultura, balun halo atividade agrikultura hanesan halo natar, kuda batar, hakiak animál, ida ne’e depende ba sira-nia atividade ne’ebé sira aprezenta mai. Atu garantia sustentabilidade apoiu ida-ne’e, tanba osan ne’e sei la hotu ho grupu ida maibé osan ne’e pelumenus bele sai hanesan fundu báziku oinsá hanesan ekonomia rotativu ba membru sira iha kada munisípiu, hosi ne’e kada munisípiu hetan milliaun $38-resin,” nia esplika.
Nia aumenta, prosesu la’o ho durasaun kle’ur hanesan prosesu ne’e hahú iha janeiru, depois orsamentu promulgadu.
“Ohin, ita foin selebra akordu iha jullu, entaun ami liu ona hosi avaliasaun lubuk ida. Ida ami ho CCLN nasionál asina memorandu entendimentu ba servisu kooperasaun servisu hamutuk iha kontrolu ba fundu ida-ne’e, ba nia membru sira iha 12 munisípiu, inklui RAEOA. Iha tinan ne’e Oé-Cusse mak seidauk, tanba depois orsamentu ne’e tutela mai iha ne’e Oé-Cusse mós dezinadu hanesan munisípiu,” nia dehan.
Sekretáriu Estadu Asuntu Veteranu, Julio da Conceição, hateten hosi parte veteranu nian haree ba asina akordu ho SASCAS ne’e hanesan pasu pozitivu ida di’ak ba apoiu veteranu 0-3 no 4-7.
“Ida-ne’e pasu pozitivu ida di’ak, atu ita-nia ema sira-ne’ebé hetan hela 0-3 no 4-7, nia oan sira bele hetan asesu ba eskola. Tanba, agora daudaun hosi Ministériu Konsellu hala’o dadauk ba de’it ema ne’ebé 8-14 ba leten nia oan no martir sira-nia oan mak bele asesu ba bolsa estudu, maibé ba 0-3 no 4-7 laiha,” nia dehan.
Veteranu 4-7 hosi munisípiu Viqueque, Eujebio da Silva Amarál, sente laran triste, tanba veteranu balun ho grau 0-3 no 4-7 emblema 8-14 simu fali subsidiu 4-7 no 0-3.
“Ami sente 0-3 no 4-7 balun imblema 8-14 simu fali subsidiu 4-7 ho 0-3 nian, ida-ne’e ami laran triste uitoan maibé laiha buat ida agora ne’e fó osan uitoan ba ami atu bele halo atividade agrikultura hanesan halo toos, natar, kuda modo, haki’ak karau, fahi no manu. Ida-ne’e ami kontente uitoan maibé ami laran triste ho grau 4-7 no 0-3 ne’e,” nia dehan.
Jornalista : Nelia Fernandes
Editór : Cancio Ximenes
