DILI, 25 jullu 2022 (TATOLI)—Prezidente Repúblika (PR), José Ramos Horta, hateten iha fulan-agostu 2022, Xefe Negosiadór Prinsipál Delimitasaun Fronteira Terrestre, Xanana Gusmão, sei dezloka ba Indonézia hodi kontinua halo diskusaun ba negosiasaun prosesu fronteira terrestre ka rai-maran entre Timor-Leste no Indonézia ne’ebé disputa hela.
Notísia Relevante: TL ho Indonézia finaliza delimitasaun fronteira terrestre iha tinan ne’e
Asuntu fronteira terrestre sai mós asuntu importante durante vizita Xefe Estadu hasoru malu ho nia omólogu Prezidente Repúblika Indonézia, Joko Widodo, oinsá nasaun rua ne’e bele tuur hamutuk atu aselera prosesu ne’e ba oin.
“Loos, iha fulan-agostu Xefe Negosiasaun Fronteira Terreste, Xanana Gusmão, sei hakat ba Indonézia, ha’u lahatene iha loron saida maibé sei akontense hodi haree bele avansa ona ho akordu fronteira terrestre,” PR Horta hateten ba jornalista sira liuhosi konferénsia imprensa iha sala VIP aeroportu internasionál Nicolau Lobato, Comoro, Dili, segunda ne’e.
Xefe Estadu ne’e hateten, kona-ba fronteira terrestre uluk antes pandemia COVID-19 ne’e, sira hetan tiha ona akordu prelimináriu ida maibé depois ho situasaun COVID-19 ho mós mundansa iha Indonézia tanba asidente boot akontese ho ministru Wiranto maibé muda ministru entaun buat sira-ne’e demora.
Maibé, Tuir Ramos Horta, informasaun ne’ebé hetan durante iha Jakarta mak iha fulan-agostu mai ne’e, Xefe Negosiasaun Fronteira Terrestre, Xanana Gusmão ho ekipa sei ba iha Jakarta hodi diskute kona-ba prosesu refere.
Notísia Relevante: TL ho Indonézia Sei Finaliza Prosesu Delimitasaun Fronteira Terrestre Hafoin COVID-19
Jornalista : Nelson de Sousa
Editór : Cancio Ximenes
