DILI, 07 Jullu 2026 (TATOLI)-Parlamentu Nasionál liuhusi reuniaun plenária tersa-feira ne’e aprova votu pezár ho unanimidade ba falesimentu Pe. João Vasconcelos Baptista Felgueiras.
Terseira Vise-Sekretária Meza Parlamentu, Maria Teresa Gusmão, hateten Parlamentu Nasionál reunidu iha sesaun plenária espresa ninia profundu pezár ba falesimentu Pe. João Felgueiras no enderesa sentida kondolénsia ba família, Igreja Katólika Timór no amigu enlutadu.
Votu ne’e hodi hato’o agradesimentu ba dedikasaun tomak maktoban nian durante moris ba defeza liberdade, dignidade no direitu povu timoroan. Ninia kompromisu inabalavel reflete konviksaun liberdade loloos bainhira sustenta husi pás, justisa no dignidade umana.
Hodi dehan testemuña vivo maktoban nian no ninia inkansavel dedikasaun povu timoroan merese profundu rekoñesimentu. Vida Padre João konstitui testemuña ida ba fé, korajen, dedikasaun tuirmai, misionáriu korasaun, edukadór husi vokasaun no pastór exelente.
“Timor-Leste hanesan ita-nia uma, povu timoroan ita-nia própriu família, ita-nia ezemplu permanese vivu, inspiradu ba hothotu ne’ebé akredita domin, esperansa no fidelidade ba evanjellu nu’udar forsa kapa’as transforma istória”, dehan.
Nia memória hanesan aman, edukadór, kompañeiru fiel, padre korazoju no inkansavel iha testemuña evanjellu nian.
Padre Jezuíta portugés ne’ebé dedika ninia moris tomak ba povu Timor-Leste, João Vasconcelos Baptista Felgueiras, hakotu ona iis iha Dili Medical Center (DMC), iha loron 03 Jullu, pur volta tuku 17h30, ho idade 105.
Padre João Vasconcelos Baptista Felgueiras moris iha Caldas das Taipas, Portugál, iha 09 Juñu 1921. Nia tama ba Companhia de Jesus iha tinan 21 no simu ordenasaun saserdotál iha tinan 29.
Iha 1971, Padre João mai Timór hodi okupa kargu hanesan Vise-Reitór Semináriu Dioseze Díli. Nia mós sai manorin lia-portugés iha Externato São José no forma intelektuál timoroan sira, inklui antigu Primeiru-Ministru Rui Maria de Araújo.
Bainhira invazaun Indonézia hahú iha tinan 1975, Padre João deside hela nafatin iha Tmór maski tenke moris iha vijilánsia husi autoridade Indonézia. Ninia dedikasaun ba povu timoroan durante tempu okupasaun halo nia sai figura importante ida iha istória Timor-Leste.
Iha tinan 2006, Padre João hamutuk ho José Alves Martins públika livru Nossas Memórias de Vida em Timor, ne’ebé relata esperiénsia no akontesimentu sira ne’ebé akorre iha Timor-Leste husi tinan 1975 to’o periodu independénsia.
Durante ninia moris, Padre João simu kondekorasaun importante barak tanba ninia servisu ba Timor-Leste no Portugál, inklui Grande Oficial Ordem da Liberdade Portugal iha tinan 2002, Insígnia Ordem de Timor-Leste iha 2009, no Grã-Cruz Ordem de Camões Portugal iha 2022.
Padre João dalabarak hateten katak nia hakarak hela no mate iha Timor-Leste, rai ne’ebé nia dedika ninia vida tomak hodi serbí povu no igreja.
Notísia relevante: Parlamentu manifesta pezár ba falesimentu Pe. João Felgueiras
Jornalista: Nelson de Sousa
Editora: Maria Auxiliadora
