VIQUEQUE, 26 jullu 2022 (TATOLI)–Diretór Ensinu Sekundáriu Jerál Sabika Besi Kulit Uatulari, Adelino da Cruz, hateten, estudante iha eskola ne’e iha na’in-rua maka ladun hatene lee.
“Iha ami-nia eskola sekundáriu ne’e daudaun estudante klase 1 iha feto na’in-rua maka lee ladun hatane, sira lee hanesan soletra maka foin lee hotu. Dala ruma parágrafu ida labele lee hotu, maibé estudante ne’e sei klase 1, profesór sira sei hakas sira hodi lee atu sira bele hatene maka ba universidade,” Diretór hateten ba Agência Tatoli, iha Viqueque, tersa ne’e.
Diretór konsidera, daudaun ne’e implementa kurríkulu foun di’ak tanba profesór sira hanorin kapítulu ida hotu tenki halo trabalhu, aprezenta iha oin no halo leitura iha oin, hodi hasa’e koñesimentu estudante sira nian.
“Nune’e, ami fahe oráriu hanesan ne’e, to’o tempu ida dehan lee leitura, entaun estudante sira halai lakon no balun la tama aula. Ami konta ne’e estudante kuaze 10% maka ladun ativu, ami mós halo karta samada ba estudante sira-nia inan-aman atu mai hasoru ami maibé inan-aman la mai oinsá maka ita bele halo kontrola sira hodi partisipa aula aprendizajen,” nia akresenta.
Notísia relevante: Edukasaun Viqueque orienta eskola sira prepara matéria ba ezame daruak
Nia dehan, lei daudaun ne’e bandu profesór sira labele baku estudante sira, nune’e estudante sira livre, dala ruma tama tuir hakarak.
“Tama eskola tarde mós profesór sira haree de’it tanba lei la autoriza baku estuda. Tanba ne’e, ha’u hanoin ona ezame períodu daruak hotu ha’u sei halo enkontru ho estudante sira-nia inan-aman sira atu hamutuk ho profesór sira oinsá maka bele kontrola estudante sira,” nia tenik.
Tuir dadus, númeru estudante sekundáriu jerál Sabika Besi Kulit Uatulari hosi klase 1 to’o klase 3 hamutuk na’in-1.008, estudante lee hatene hamutuk 1.006 maka hatene lee leitura tuir prova profesór sira hosi eskola.
Daudaun, profesór sira hahú prepara ona matériu ba ezame períodu daruak ne’ebé sei realiza iha loron 08 agostu.
Jornalista : Vitorino Lopes da Costa
Editora : Julia Chatarina
