DILI, 26 jullu 2022 (TATOLI)—Instituto Nasional de Formação de Docentes e Profissionais da Educação de Timor-Leste (INFORDEPE) hahú halo ona limitasaun idade ba profesór permanente no kontratadu ne’ebé atu kontinua estudu iha universidade atu hetan grau akadémiku baxarelatu.
Prezidente INFORDEPE, Manuel Gomes de Araujo, hateten, daudaun iha dadus profesór atu kontinua grau akadémiku baxarelatu.
“Ami limita ona idade profesór baxarelatu másimu to’o de’it 45 anos, atu nune’e bainhira ema ne’e finaliza estudu bele iha tinan 10 hodi serví edukasaun,” Prezidente INFORDEPE informa iha edifísiu INFORDEPE, tersa ne’e.
Notísia relevante: MESSK hahú verifika dokumentu graduasaun INFORDEPE
Maski nune’e, depende ba númeru profesór baxarelatu atu kontinua estudu tanba INFORDEPE iha ona planu profesór baxarelatu atu kontinua grau baxarelatu ne’e tenke atinje 1.200 no karik la atinje INFORDEPE sei aumenta númeru idade maibé labele liu tinan 50.
“Ita lakohi gasta osan hodi prodús graduadu sira ikus mai la aproveita tanba ema ne’e tama idade reforma no ita gasta osan saugati de’it,” nia akresenta.
Ba tinan ida-ne’e tuir planu prioridade INFORDEPE nian sei loke tan oportunidade ba profesór permanente hamutuk 1.200 atu kontinua grau baxarelatu, maibé iha levantamentu dadus númeru ne’e atinje ona to’o 1.400 no planu sei nafatin bazeia ba númeru ne’ebé deside ona.
Prosesu ne’e realiza iha setembru tinan ida-ne’e no orsamentu ne’ebé maka INFORDEPE prevee ona ho montante $300.000 resin sei bele kobre hotu ba totál profesór 1.400.
“Ida-ne’e depende ba akordu entre Ministériu Edukasaun Juventude no Desportu (MEJD) no Universidade Nasionál Timor-Lorosa’e (UNTL), hafoin akordu ida-ne’e iha maka foin iha fali akordu seluk entre INFORDEPE ho UNTL. Ita bele dehan akordu sira ne’e kategoria primeiru akordu polítiku no segundu akordu tékniku, ami ko’alia ona ho Reitór UNTL no nia konkorda hodi hateten hein memorandu entendimentu entre ministériu ho UNTL, bainhira realiza bele halo rua ne’e dala-ida. Entaun baxarelatu ida foun nian bele realiza ona,” nia dehan.
Jornalista : Tomé Amado
Editora : Julia Chatarina
