DILI, 26 jullu 2022 (TATOLI)—Ministériu Asuntu Kombatente Libertasaun Nasionál (MACLN) aprova ona bolsa estudu 2022 ba benefisiáriu veteranu nia oan sira iha territóriu nasionál hamutuk 839.
Notísia Relevante: MAKLN sei taka sai lista bolsa estudu ba veteranu nia oan
Sekretáriu Estadu Veteranu Kombatente Libertasaun Nasionál (SEAKLN), Júlio da Conceição ‘Loro Mesak’, hateten totál veteranu grau 0-3 no grau 4-7 nia oan sira-ne’ebé hatama dokumentu ba programa bolsa estudu veteranu nia oan ne’e hamutuk 1.138.
“Veteranu nia oan sira-ne’ebé mai hatama dokumentu iha MACLN ba asesu bolsa estudu maibé ami aprova de’it 839 ne’e hahú husi Ensinu Báziku Filial to’o iha Ensinu Superiór,” Loro Mesak hateten ba Agência TATOLI, iha nia kna’ar fatin Caicoli, Dili, tersa ne’e.
Hosi númeru aprovadu ne’e, kompostu hosi Ensinu Báziku Primeiru siklu hamutuk 55, Ensinu Báziku segundu no terseiru siklu hamutuk 130, Ensinu Sekundáriu hamutuk 130 no Ensinu Superiór hamutuk 524.
Veteranu nia oan sira-ne’ebé MACLN la aprova ne’e hamutuk 299 tanba sira-nia dokumentu la kompletu.
Tuir nia, programa bolsa estudu ba veteranu nia oan tinan 2022 ne’e, tuir planu kada munisípiu ema na’in-100 maibé ema barak mak la prenxe rekezitu.
“Bolsa Estudu ne’ebé ami loke ba veteranu nia oan ne’e ami-nia meta ba iha kada munisípiu ema na’in-100 no programa refere loke ba Ensinu Baziku Primeiru siklu hamutuk na’in-10, Ensinu Báziku segundu no terseiru ano hamutuk 10, Ensinu Sekundáriu 10 no Ensinu Superiór hamutuk 70,” nia esplika.
Daudaun ne’e, nia dehan, SEAKLN taka sai ona lista benefisiáriu iha munisípiu sira no tuir planu sei atribui osan iha fulan agostu 2022.
Notísia Relevante: Governu Austrália sei fó bolsa estudu ba veteranu nia oan sira
Jornalista : Osória Marques
Editór : Cancio Ximenes
