CEFTEC sei realiza formasaun RP no multimedia iha Baucau-Lautém-Bobonaro
DILI, 27 jullu 2022 (TATOLI)—Koordenadór Sentru Formasaun Téknika Komunikasaun (CEFTEC-sigla portugues), Rafael da Silva Freitas, hateten tuir planu iha tinan ne’e CEFTEC sei realiza formasaun Relasaun Públika (RP), protokolu no multimedia iha munisípiu Manatuto, Baucau, Bobonaro no Lautém.
“Ami-nia planu iha tinan ne’e, ami sei hala’o formasaun relasaun públika, protokolu no multimédia iha munisípiu haat maka Manatuto, Baucau, Bobonaro no Lauéem,” Rafael da Silva Freitas hateten ba Agênsia Tatoli iha nia kna’ar fatin, Palásiu Governu, Dili, kuarta ne’e.
Formasaun iha munisípiu haat (4) ne’e iha munisípiu tolu mak ho formasaun ba unidade multimédia no Bobonaro ho unidade relasaun públika no protokolu.
Tuir Ministru (MAPKOMS) nia orientasaun foin dadauk sira ba halo programa naroman ba suku nia haree iha RAEOA liga ba protokolu ne’e presiza hasa’e, entaun ida-ne’e tempu besik CREFTEC sei ba hasoru Prezidente Autoridade RAEOA hodi ko’alia kona-ba formasaun refere no formasaun iha munisípiu haat ne’e fiksu ona.
Iha matéria ba formasaun, tuir modul CEFTEC nian ba unidade relasaun públika no protokolu, iha nível ida ko’alia kona-ba relasaun públika, protokolu no oinsa ko’alia iha oin.
“Sira iha ne’ebá sei prátika, oinsá serve ema boot sira-ne’ebé tuur iha meza, maneira han oinsá, ami sei foká liubá ida-ne’e. Kona-ba protokolu, hanesan iha eventu boot sira oinsá sira atu organiza. Tanba limitasaun tempu, loloos iha nível nasionál ami-nia modul sira to’o oras 80, maibé ba munisípiu ami halo rezumu de’it, ida importante hanesan prátika mak ami ba no oinsá simu bainaka, ida ne’e mak ami sei ba,” nia dehan.
Ba multimedia, CEFTEC fó formasaun tanba relasiona ho media officer iha munisípiu sira publika notisia iha sira-nia pájina la tuir estandar, entaun CEFTEC ba atu haforsa sira-nia parte atu oinsá hakerek notísia tuir estandar, la’ós atu di’akliu fali jornalista sira maibé sira mós bele hatene hakerek ho di’ak.
Hosi formasaun ne’e, sei iha formadór na’in-rua mak sei fó formasaun no hosi formadór rua ne’e kada unidade iha formadór na’in-ida.
Tuir planu, formasaun ne’ebé realiza iha munisípiu Manatuto hahú hosi 14-19 agostu, Baucau hahú hosi 21-26 agostu, Bobonaro hahú hosi 04-09 setembru no Lautém hahú hosi 11-16 setembru 2022.
Entretantu, partisipante ba formasaun relasaun públika protokolu no multimedia iha munisípiu Manatuto, Baucau, Bobonaro no Lautém sei mai hosi media oficer hosi instituisaun, jornalista rádiu komunidade, ajente administrasaun no sira seluk.
Enkuantu totál orsamentu CEFTEC aloka ba formasaun ne’ebé realiza iha munisípiu haat ne’e hamutuk $10,848.00.
Jornalista : Nelia Fernandes
Editór : Cancio Ximenes
