iklan

EKONOMIA, DILI, HEADLINE, POLÍTIKA

Horta hakarak TL iha soberania ai-han no mellora nutrisaun ba populasaun

Horta hakarak TL iha soberania ai-han no mellora nutrisaun ba populasaun

Prezidente Repúblika, José Ramos-Horta. Imajen Tatoli/Francisco Sony.

DILI, 27 jullu 2022 (TATOLI)—Prezidente Repúblika (PR), José Ramos Horta, hakarak Timor-Leste (TL) iha soberania ai-han nomós mellora nutrisaun ba populasaun.

Reprezentante Organizasaun Nasaun Unida ba Aihan no Agrikultura (FAO, sigla Inglés) ba Indonézia no Timor-Leste, Rajendra Aryal. Imajen/Natalino Costa.

“Prezidente Repúblika hakarak haree oinsá mak nasaun ne’e bele iha soberania ai-han no mós bele mellora nutrisaun ba populasaun. Entaun Prezidente Repúblika hakarak tebes konvoka kolaborasaun hosi parte hotu atu bele mellora investimentu setór agrikultura hodi responde ba má-nutrisaun no sira seluk,” Reprezentative Food and Agriculture Organization (FAO) iha Timor-Leste, Rajendra Aryal, hateten ba jornalista sira hafoin hala’o enkontru ho Xefe Estadu iha Palásiu Prezidensiál Nicolau Lobato, Bairru Pite, kuarta ne’e.

Durante sorumutu, reprezentante FAO ho PR ko’alia kona-ba asuntu agrikultura, seguransa alimentár, nutrisaun no problema kona-ba bee no haree oportunidade oinsá bele hametin liután kolaborasaun FAO ho Timor-Leste iha área sira-ne’e, no ko’alia mós kestaun mudansa klimátika no dezastre oioin ne’ebé akontese iha Nasaun barak nomós fó impaktu ba iha Timor-Leste.

Reprezentante FAO iha Timor-Leste ne’e hateten, iha sorumutu ne’e ko’alia mós estratéjia oinsá bele servisu hamutuk atu responde ba krize oioin inklui krize ne’ebé akontese iha nasaun seluk impaktu ba seguransa ai-han iha rai-laran.

“Hanesan funu entre Rúsia ho Ukráina daudaun fó impaktu tebes ba nasaun barak liu-liu ba hirak ne’ebé depende ba importasaun ai-han hanesan trigu, mina, nune’e oinsá mak atu haree tanba daudaun ne’e Timor- Leste ladún hetan impaktu makaas maibé bainhira aumenta tan tempu TL hetan impkatu mós,” nia dehan.

Sorumutu ho PR ne’e ko’alia estratéjia oinsá Timor-Leste bele mellora liután produsaun ai-han lokál, nune’e Timor-Leste bele iha soberania ai-han no TL nia dependénsia ba importasaun bele redús uitoan.

Durante sorumutu, FAO hato’o agradese ba Prezidente Repúblika ninia lideransa hodi troka ideia iha área vitál sira-ne’e oinsá mak bele hametin kolaborasaun iha área sira-ne’e iha Timor-Leste.

FAO implementa programa lubun iha setór agrikultura

Reprezentative Food and Agriculture Organization (FAO) iha Timor-Leste, Rajendra Aryal, informa daudaun ne’e FAO implementa programa lubun ida iha Timor-Leste mak hanesan promove konservasaun agrikultura atu bele mellora produsaun ai-han, jestaun sustentabilidade peska  no mós produsaun ikan iha rai-laran.

Ba área floresta, haree estudu kona-ba ema sunu-rai no mós estabelese sistema ne’ebé bele halo jestaun sustentável ba floresta no oinsá setór agrikultura bele iha adaptasaun di’ak liután ho mudansa klimátika.

FAO hanesan ajensia téknika ida Nasaun Unida nian hodi fó asisténsia téknika halo hamutuk ho Ministéiru Agrikultura no Peska (MAP) no durante ne’e FAO mobiliza finanseiru hosi parsieru sira mak implementa direta atividade iha área importante sira-ne’e.

Daudaun ne’e, FAO nia programa ba tinan lima hosi 2020-2025 ne’e totál millaun $24  hodi implementa programa área vital hirak ne’e iha Timor-Leste.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!