OÉ-CUSSE, 27 jullu 2022 (TATOLI) – Komisaun Funsaun Públika (KFP), realiza simulasaun kona-bá promosaun, avaliasaun dezempeñu, baze dadus no seguransa sosial, inklui proposta estrutura orgánika ba entidade sira iha Rejiaun Administrativa Espesiál Oé-Cusse Ambeno (RAEOA).
Komisáriu Komisaun Funsaun Públika (KFP), protofóliu forsa traballu, avaliasaun dezempeñu, formasaun no dezenvolvimentu, António Freitas, akompaña hosi Diretor Nasionál sira iha Funsaun Públika, realiza simulasaun ne’e RAEOA.
Atividade traballu ne’e realiza durante loron haat iha RAEOA, hahú tersa no remata iha sesta, 29 jullu.
Komunikadu imprensa ne’ebé Agência Tatoli asesu iha kuarta ne’e, molok realiza atividade ne’e, Komisáriu KFP ho ekipa enkontru kortejia ho Prezidente Autoridade RAEOA, Arsenio Paixão Bano, iha rezidénsia ZEESM Oé-Cusse hodi relata atividade ne’ebé mak hala’o iha rejiaun ne’e.
“Iha atividade kona-bá simulasaun ba promosaun, avaliasaun dezempeñu ka mapa pessoal, baze dadus, seguransa sosiál, proposta estrutura orgánika RAEOA nian, ne’ebé oras ne’e iha Konsellu Ministru inklui planu halo monitorizasaun ba iha instituisaun sira hanesan saúde, edukasaun, agrikultura, obra públika no mós diresaun nasional transporte terrestre,” refere iha nota imprensa ne’e.
Iha enkontru kortejia ne’e, Prezidente Autoridade RAEOA, Arsenio Paixão Bano, konsidera atividade simulasaun ne’e ne’e importante no presiza iha koordenasaun serbisu ne’ebé di’ak entre Autoridade RAEOA no Komisaun Funsaun Públika ba programa diseminasaun inklui oinsá atu aselera proposta estrutura orgánika RAEOA nian ba prosesu selesaun méritu ba kargu diresaun xefia iha RAEOA atu mellora prestasaun serbisu ba públiku.
Prezidente Autoridade RAEOA ne’e mós konkorda kona-bá programa monitorizasaun ba instituisaun sira, nune’e nia parte orienta diretór funsaun públika iha RAEOA atu akompaña ekipa durante monitoziasaun hodi identifika no rejista problema ne’ebé mosu no oinsá bele buka nia solusaun.
Jornalista : Abílio Elo Nini
Editór : Evaristo Soares Martins
