DILI, 27 jullu 2022 (TATOLI) – Ministériu Saúde (MS) liuhosi Diretór Nasionál Saúde Públika iha Ministériu Saúde, Frederico Bosco, hateten iha preokupasaun boot tanba laiha meiu ka laiha laboratóriu atu teste kualidade ai-han importasaun sira.
“Agora daudaun ita laiha laboratóriu ida atu analiza kualidade produtu lokál no importadu sira molok populasaun konsumu hodi garante saúde públika,” Diretór ne’e hatetetn ba Agência TATOLI iha nia knaar fatin Caicoli, kuarta ne’e.
Nune’e, Diretór ne’e dehan importante tebes atu investe iha infraestrutura báziku liuliu konstrui laboratóriu hodi hala’o teste ba ai-han importasaun sira, hafoin populasaun konsumu.
Maske, Ministériu Saúde kontinua esforsu atu dezenvolve sistema sira atu kontrolu ba ai-han sira iha munisípiu hotu, maibé laiha laboratóriu atu halo teste.
Timor-Leste adere ba CODEX aliementar iha fulan fevereiru tinan 2018, nune’e resposbailidade ba Estadu Timor-Leste atu implementasaun programa konjuntu ho padraun alimentar sira ne’ebé kualidade ai-han ba konsumu públiku.
Molok ne’e, Ministériu Saúde hamutuk ho Food and Agriculture Organization (FAO) no Organizasaun Saúde Mundiál (OMS), hala’o ona lansamentu dahuluk ba projetu Codex Alimentarius iha tinan 2022 to’o 2024 iha Timor-Leste.
Codex Alimentarius hanesan kolesaun ba padraun, kódigu prátika, diretrize no rekomendasaun ne’ebé aseitavel mundialmente relasiona ba alimentasaun, produsaun alimentár no seguransa alimentar.
“Ita hotu hatene katak sai membru ba CODEX alimentár ne’e prosesu naruk, maibé to’o fim ita alkansa no ita sai membru ba CODEX alimentár ho membru hamutuk 188 no Prezidente Komisaun CODEX alimentár iha Timor-Leste, Odete da Silva Viegas,” nia hateten
Esforsu sai nasaun membru ba CODEX ne’e la’ós Ministériu Saúde de’it, maibé ba liña ministeriál sira hanesan Ministériu Agrikultura no Peska, Ministériu Turizmu, Komérsiu no Indústria, Autoridade Inspesaun Fiskalizasaun Atividade Ekonómika Sanitária no Alimentár (AIFAESA) inklui parseiru internasionál sira ne’ebé mak kontribui ba papél ida ne’e.
Timor-Leste hanesan membru presiza aprende liután ba seguransa alimentár no aproveita másimu iha prinsípiu kona-bá seguransa alimentar no mós atu defende konsumidór sira nia direitu ho objetivu atu fó protesaun ba saúde públiku no komérsiu kuantitativu iha área alimentasaun nian.
Jornalista: Felicidade Ximenes
Editór : Florencio Miranda Ximenes
