DILI, 27 jullu 2022 (TATOLI)—Prezidente Parlamentu Nasionál, Aniceto Longuinhos Guterres Lopes, enkoraja mídia estatál Agência TATOLI, Institutu Públiku (TATOLI, I.P) atu dezempeña papél hodi kombate informasaun “hoax” iha mídia sosiál liuhosi hato’o informasaun ho loloos.
Aniceto Guterres hateten, rai hotu-hotu Agência Noticiosa ofisiál ne’e dezempeña papél importante hanesan mós Timor-Leste iha Agência Noticiosa TATOLI ne’ebé sai referénsia ba mídia hotu-hotu iha rai-laran.
“Agora ita iha mundu ne’ebé mais modernu no iha mós mídia sosiál ne’ebé dalaruma envez hato’o informasaun ne’ebé lolo’os maibé dalaruma halo fali distorsaun ba informasaun sira-ne’e. Ha’u hein katak Agência Noticiosa ofisiál sira Estadu TATOLI tenke dezempeña papél importante atu hato’o informasaun atu halo loos informasaun sira-ne’ebé parte sira tenta halo distorsaun,” Prezidente Parlamentu Nasionál, Aniceto Longuinhos Guterres Lopes, hato’o nia mensajen relasiona ho aniversáriu Agência TATOLI ne’ebé, kuarta ne’e, kompleta nia ezisténsia ba tinan neen (6).
Lidér Segundu Órgaun Soberania ne’e nia mensajen importante ida mak enkoraza Agência Noticiosa TATOLI Estadu nian atu hato’o informasaun ba povu Timor-Leste no iha mundu ho informasaun ne’ebé atuál no faktuál.
“Nune’e, evita laiha hoax ita-nia sosiedade konsume informasaun ho loloos, di’ak ho dignidade lori Estadu Timor-Leste nia naran,” nia hateten.
Prezidente Parlamentu Nasionál ne’e la ko’alia kestaun tékniku liga konteúdu notísia sira durante públika hosi TATOLI maibé TATOLI ninia objetivu ho karáter atu hato’o informasaun.
“Ha’u la tama ba konteúdu tanba ne’e mais téknika, Agência Tatoli hanesan nia objetivu nia kárater ba atu informasaun iha oioin, ita dehan notísia hanesan informasaun hosi Estadu, Governu no hosi públiku vise-versas,” nia hateten.
Maibé, nia hateten, tenke hatene ta’is iha situasaun agora hanesan mídia sosiál komesa domina ba mundu informasaun oinsá mak Agência TATOLI bele interven atu halo loos hotu informasaun sira-ne’ebé to’o ba sosiedade no públiku ka komunidade nasionál ho internasionál. Dezde informasaun ne’ebé loos, faktuál, atuál ne’e nia konteúdu. ho ida-ne’e mak ita hakarak.
Prezidente Parlamentu Nasionál, Aniceto Guteres, lori Parlamentu Nasionál hato’o votu parabéns ba funsionáriu no jornalista Agência TATOLI ne’ebé komemora ninia aniversáriu ba dala-VI ho deseju susesu nafatin ba oin hodi servi nasaun no povu liu hosi informasaun.
Jornalista : Nelson de Sousa
Editór : Cancio Ximenes