DILI, 27 jullu 2022 (TATOLI)–Líder Nasionál, Kay Rala Xanana Gusmão, enkoraja mídia estatál, Agência Noticiosa de Timor-Leste-Tatoli, Institutu Públiku (Agência Tatoli, I.P) kumpre nafatin misaun imprensa nian.
Líder karizmátiku ne’e hato’o kestaun ne’e relasiona ho aniversáriu Agência Tatoli, I.P ba da-VI iha loron 27 jullu 2022.
“Parabéna ba Agência Tatoli, ba imi-nia tinan ne’e, husu boot imi sei moris naruk hodi kumpre nafatin misaun imprensa nian, Timor-Leste presiza imprensa ne’ebé independente no di’ak, atu nune’e, la’ós notísia mai publika liu kedas maibé tenki halo investigasaun didi’ak, tenki hatene didi’ak mak hasai (publika) atu ema bele fó fiar,” Xanana Gusmão hato’o mensjen ne’e ba Agência Tatoli, iha Aeroportu Internasionál Prezidente Nicolau Lobato, Comoro, foin lalais ne’e.
Notísia relevante: Xanana sei ba Indonézia halo diskusaun prosesu fronteira terrestre iha agostu
Eis Primeiru-Ministru enkoraja ba Agência Tatoli ne’ebé foin tinan VI ezisténsia, atu la’o ho kbiit, ho matenek hodi ajuda imprensa dezenvolve mentalidade, liuliu joven sira nian tanba informasaun presiza duni.
“Ohin loron ne’e lakon tempu ho buat ida rede sosiál, book ba book mai, insulta ba insulta mai, halo informasaun arbiru de’it, ne’e duni Agência Tatoli buka hadi’a-an no konsolida-an atubele sai hanesan imprensa ne’ebé ita-nia povu husu ita atu kompreende problema no komprende asuntu hotu ne’ebé ita-nia rain moris agora,” nia fó hanoin.
Agência Tatoli, I.P nu’udar ajénsia ofisiál Estadu Timor-Leste nian, ne’ebé ninia ezisténsia mai hosi inisiativa Sekretaria Estadu Komunikasaun Sosiál (SEKOMS) iha tinan 2017, nu’udar transformasaun hosi East Timor News Agency (ETNA), ne’ebé nakfila ba Ajénsia Notisioza Timor-Leste (ANTIL), no ikus mai sai Agência Tatoli.
Ajénsia Estadu ne’e hetan aprovasaun iha reuniaun Konsellu Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL ne’ebé lansa iha 27 jullu 2016.
Nune’e, Konsellu Ministru iha marsu 2017, transforma ANTIL sai Agência Tatoli, nu’udar ajénsia ofisiál Estadu Timor-Leste no publika iha Jornál Repúblika, ho estatutu nu’udar Institutu Públiku (I.P).
Objetivu estabelese Agência Tatoli, I.P hodi fontes informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita hosi públiku utilizadór informasaun iha eskala nasionál, rejionál no internasionál, bazeia natureza no karakterístika, rapidez no rigór, ne’ebé la ignora rigoroza hanesan akurásia, indepedente, inzenta, klarez no nafatin iha integridade no mós kualidade.
Jornalista : Antónia Gusmão
Editora : Julia Chatarina
