DILI, 27 jullu 2022 (TATOLI)– Komandu Munisípiu Bobonaro, liuhosi Unidade Polisia Tránzitu Rodoviaria ne’ebé hetan apoia hosi Forsa Rezerva, halo atividade pasa revista iha dalan públiku no konsege halo apreensaun ba motorizada hamutuk 21 ne’ebé viola kódigu estrada, iha área Rai Foun, suku Ritabou, postu administrativu Maliana, munisipiu Bobonaro.
Komandante PNTL Munisípiu Bobonaro, Superintendente Polísia Antoninho Mauluta, hateten atividade pasa revista ne’e konsege identifika motorista barak maka laiha asesores no dokumentu motór nian.
“Ohin ita halo atividade pasa revista ba transporte públiku sira ne’ebe sirkula via estrada públiku iha área rua maka hanesan Suku Ritabou ita prende motorizada hamutuk 14 no suku Holsa motorizada hitu, no maioria infratór sira ne’e viola kodigu estrada tanba tula malu la uza kapasete, espellu laiha, xapa matrikula laiha, dokumentu invalidu, karta kondusaun no dokumentu motór laiha,” Komandante Mauluta, hateten liuhosi nota ne’ebé Agência TATOLI asesu, kuarta ne’e.
Nia dehan, infratór sira ne’e aplika ona koima hodi sira ba selu iha banku Banco Nacional de Comércio de Timor-Leste maka foti fali sira nia motór ne’ebe PNTL halo ona apreensaun.
Atividade pasa revista ne’e atu prevensaun asidente tráfegu no dezenvolve kampaña seguransa rodoviária inklui atu eduka sidadaun no estudante sira hodi respeita lei tránzitu no kódigu estrada nian.
Komandante Mauluta subliña, nia parte sei foti medida forte ba infratór sira ne’ebé hetan ona infrasaun husi seksaun Tránzitu Munisípiu Bobonaro nian, maibe kontinua halo movimentu iha estrada públiku.
“Ba infratór sira ne’ebe hetan ona infrasaun hodi kontinua viola kódigu estrada dala rua ba leten ita aplika sansaun selu multa másimu ba sira,”nia apela.
Komandante ne’e hatutan, polísia Tránzitu munisipiu Bobonaro sei regularmente hala’o pasa ravista ba transporte públiku no privadu ne’ebé mak movimenta iha dalan hodi dezenvolve kampaña seguransa rodoviária inklui atu eduka sidadaun sira hodi respeita kódigu estrada.
Jornalista: Natalino Costa
Editór : Florencio Miranda Ximenes
