iklan

EDUKASAUN, HEADLINE

ANAAA halo avaliasaun atu hadi’a kursu no instituisaun sira

ANAAA halo avaliasaun atu hadi’a kursu no instituisaun sira

Diretór Ezekutivu ANAAA, Edmundo da Silva Viegas. Imajen TATOLI/Egas Cristóvão

DILI, 28 jullu 2022 (TATOLI)—Diretór Ezekutivu Ajénsia Nasionál Avaliasaun Akreditasaun Akadémiku (ANAAA), Edmundo da Silva Viegas, hateten, avaliasaun akreditasaun institusionál no avaliasaun ba programa estudu sira atu buka hadi’a kondisaun infraestrura no rekursu umanu iha instituisaun sira.

“ANAAA la halo avaliasaun atu buka frakeza hodi fó multa ba instituisaun no kursu sira. Finalidade hosi avalisaun ne’e la’ós atu ba buka ema nia sala ka infrasaun hodi fó multa maibé ami ba haree kondisaun hodi hadi’a,” Diretór relata iha salaun Delta Nova, kinta ne’e.

ANAAA mós fó rekomendasaun atu universidade ka instituisaun ensinu superiór sira hodi bele halo follow up hodi bele hadi’a kondisaun limitadu atu kada tinan bele kontinua hadi’a ba beibeik.

“Ami-nia karater avaliasaun ne’e atu avalia de’it sira-nia kondisaun,” nia akresenta.

Notísia relevante: ANAAA lansa avaliasaun kursu iha instituisaun hitu

Hosi prosesu avaliasaun ne’ebé ANAAA halo atu haree kona-ba rekursu umanu, fasilidade no infraestrura ne’e nu’udar sasukat ka padarun ida ho ninia pezu boot atu ajénsia bele halo avaliasaun ba programa estudu ka instituisaun sira, tanba ne’e bainhira avalisaun ANAAA mak hatudu kursu ne’e hetan 77% mak sei tama hela iha kategoria sufisiente.

“Signifika kondisaun, fasilidade, no rekursu umanu ne’ebé atu implementa kurríkulu ne’e maka seidauk di’ak liu no sira sei iha nível sufisiente. Ida-ne’e maka rezultadu ne’ebé hatudu iha prosesu avaliasaun ba kursu sira. Tanba ne’e, maka kuandu padraun ualu iha akreditasaun institusionál no padraun 10 iha akreditasaun prográmatiku ne’e, bainhira exelente hotu ona bele tama ona iha klasifikasaun A,” nia tenik.

Rezultadu sei hatudu hela maioria 77% ne’e sei tama hela klasifikasaun C, signifika kondisaun hotu-hotu sei limitadu hela, maibé la signifika iha infrasaun.

Enkuantu, kona-ba efetividade avaliasaun no métodu ne’ebé ANAAA uza hanesan mós métodu ne’ebé maka rai sira seluk uza no la aliña ho métodu ka padraun internsionál.

“Kona-ba efetividade ne’e hanesan meiu efetivu liu ne’ebé ami uza hodi ba haree kondisaun instituisaun no kursu sira hodi fó klasifikasaun ba sira,” nia tenik.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!