DILI, 27 jullu 2022(TATOLI)— Internista Hospitál Nasionál Guidu Valadares (HNGV), Celia Gusmão, hateten atu prevene ba moras epatite B mak tenke hala’o atividade imunizasaun no kontrola regularmente iha fasilidade saúde sira.
“Ita atu halo perevensaun ba epatite B importante mak vasina no ba inan isin rua ne’e presiza kontrola maka’as atu nune’e labele transmite ba bebé sira iha kabun laran,” Internista HNGV ne’e hateten ba jornalista sira iha nia kna’ar fatin HNGV Bidau-Dili, kinta ne’e.
Moras epatite B hanesan transmisaun ida ne’ebé hanesan HIV SIDA tanba hosi inan ba oan ka ema ida ba ema seluk liuhosi relasaun seksuál.
Moras epatite hanesan vírus ida ne’ebé afeta ema bele rezulta ema nia sistema imunidade tanba moras ne’e iha oin lima hanesan A, B, C, D no E, maibé ida grave liu mak epatite B.
“Moras ne’e nia tratamentu lori tempu naruk no bele estraga ka halo komplikasaun ba ema aten. No ema ne’ebé afeta ba epatite B tenke kontrola regularmente iha fasilidade saúde nune’e bele prevene,” nia afirma.
HNGV fó ona tratamentu ba moras epatite hahú fulan abríl to’o juñu 2022 hamutuk 333, hosi númeru mane 175 no feto 158.
Jornalista : Felicidade Ximenes
Editór : Florencio Miranda Ximenes
