DILI,28 jullu 2022 (TATOLI)— Reprezentante Organizasaun Mundiál Saúde (OMS) iha Timor Leste, Arvind Mathur, apresia preperasaun Governu Timor-Leste liuhosi Ministériu Saúde nia preparasaun hasoru Monkeypox ou variola de macaco.
“OMS deklara ona moras Monkeypox (Variola do Macaco) sai nu’udar emerjénsia ba saúde públika (PHEIC) tanba daudaun ita iha situasaun bo’ot ida ne’ebé emerjénsia rua la’o simultámente iha tempu hanesan mak pandemia COVID-19 no moras monkeypox,” Reprezentante OMS iha TL ne’e hateten liuhosi nota ne’ebé Agência TATOLI asesu, kinta ne’e.
Notísia relevante: Governu hahú prepara estratéjia prevene vírus “monkeypox”
Nune’e, OMS orgullu bainhira observa preparasaun ba asaun sira ida ne’ebé Ministériu Saúde foti ona, espesialmente hasoru moras Monkeypox. Tanba asaun sira ne’e mak ativasaun ba komisaun kontra surtu nian, preparasaun ba planu kontinjénsia sira, preparasaun laboratóriu nian no mós komunikasaun ba risku.
“Importante tebes ba ita atu hatene katak vizilánsia, diagnoze no mós redusaun ba risku sira sai hanesan pontu fokál ba prevensaun, transmisaun moras ida ne’e no vasina sira mak importante atu hapara surtu ne’e,” refere nota.
Fulan hirak liu ba dezde relatóriu ba kazu monkeypox, Ministériu Saúde ho suporta husi OMS iha Timor-Leste hala’o ona sesaun treinamentu neen ba pesoál saúde hanesan Doutór, enfermeiru no parteira sira iha HNGV no mós ospitál refereál sira atu asegura iha pontu entrada sira hanesan aeroportu no fronteira terrestre no portu.
“Ami orgullu atu informa katak OMS prodús ona ekipamentu atu teste moras Monkeypox nian ne’ebe oras ne’e daudaun disponivél no prontu ona iha Laboratóriu Nasionál,” nia afirma.
Daudaun ne’e, OMS iha Timor Leste kontinua atu orienta no fó treinamentu hodi bele atualiza pesoál sira nia koñesimentu ba iha moras Monkeypox hodi bele haforsa tan vizilánsia iha nasaun ida ne’e.
Monkeypox da’et entre ema liu hosi kontaktu fíziku ho ema ne’ebé iha ona moras refere, inklui mós liu hosi relasaun seksuál.
Iha Timor-Leste daudaun risku ba populasaun sei ki’ik hela, maibé importante tebes ba ema hotu atu hatene kona-ba moras ne’e nia metódu infensaun, nia sintoma sira, no mós saida mak ema hotu tenke halo bainhira detetadu suspeitu ho moras monkeypox.
Nune’e, OMS iha Timor-Leste suporta nafatin sensibilizasaun informasaun kona-ba moras ida ne’e no mós servisu hamutuk nafatin ho Ministériu Saúde hodi bele foti asaun tuir nesesidade iha futuru.
Notísia relevante: MS-OMS hahú diskute preparasaun hasoru moras Monkeypox
Jornalista : Felicidade Ximenes
Editór : Florencio Miranda Ximenes
