DILI, 28 jullu 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hateten PN fó apoiu ba Prezidente Repúblika (PR), José Ramos Horta, ninia esforsu tuir dokumentu fraternidade umana hodi halo rekonsiliasaun ho timoroan sira iha Timor Osidentál ho timoroan iha Timor-Leste.
Notísia Relevante: PN aprova rezolusaun adota deklarasaun Pás Mundiál ho unanimidade
Aniceto Guterres hateten, fraternidade umanu ne’e dokumentu ida universál tanba ne’e dokumentu ida produtu hanesan mensajen hamutuk hosi Papa Francisco ho Iman Al-Azhar, ne’ebé Timor-Leste mak nasaun dahuluk adota dokumentu ida-ne’e sai dokumentu referénsia nasionál liu-liu hosi rezolusaun PN mak adota no instrui Governu hodi dokumentu ne’e sai referénsia.
“Laiha problema, PN mós adota ho rezolusaun ida até ita dehan PN apoiu. Entaun hanesan Xefe Estadu no timoroan ita mós iha problema sira hanesan ne’e, ita trata malu ho baze dokumentu fraternidade umana tanba ne’e referénsia, ita rezolve ita-nia situasaun mós ho pás, estabilidade, rekonsiliasaun entre timoroan sira,” Prezidente Parlamentu Nasionál, Aniceto Guterres, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, kinta ne’e.
Durante sorumutu, Prezidente PN Aniceto Guterres, informa ba Xefe Estadu kona-ba nivél Parlamentu Nasionál ho DPR Indonézia konkorda malu tiha ona desde tinan hirak liubá atu vizita malu, no tinan ne’e PN Timor-Leste mak atu ba halo vizita ba DPR Indonézia iha loron 22 ou 23 fulan-agostu ne’e.
Iha sorumutu ne’e, Xefe Estadu fó hanoin ba Prezidente Parlamentu Nasionál bainhira ba vizita Indonézia karik tanba DPR Indonézia seidauk trata dokumentu fraternidade umana hanesan PN Timor-Leste adota, nune’e oinsá DPR Indonézia bele adota mós.
“Tanba parese mós sira iha ne’eba problema situasaun ladi’ak liu Timor nian, Timor mós iha problema no sira mós iha sira-nia problema boot liután. Entaun, dokumentu ida-ne’e sai hanesan referénsia oinsá sosiedade rezolve sira-nia problema hodi rekonsilia malu no estabelese pás ba sosiedade tomak,’’ nia hateten.
Antes ne’e, Prezidente Repúblika hala’o vizita Estadu ba Indonézia foin lala’is ne’e hasoru malu mós ho lidér timoroan pro-autonomia sira hanesan Basílio dias de Araújo, Francisco Xavier Lopes da Cruz, Eurico da Costa, iha Jakarta no Kupaun, hodi hato’o kona-ba dokumentu fraternidade umana relasiona ho situasaun timoroan sira iha Timor Osidentál ne’ebé hakarak atu fila mai Timor-Leste tuir ida-idak nia konsiénsia rasik.
PR Horta atualiza vizita Indonézia ba PPN
Prezidente PN, Aniceto Guterres, hateten durante enkontru Xefe atualiza mós ninia vizita Estadu ba Indonézia foin lalais ne’e.
“Enkontru ida ohin troka informasaun kona-ba situasaun Estadu nian no mós hosi Prezidente Repúblika hato’o informasaun kona-ba vizita ba Indonézia, ne’ebé ita boot sira (jornalista) akompaña Prezidente Repúblika nian vizita la’o di’ak no ita hotu akompaña ho susesu,” nia hateten.
Lidér segundu órgaun soberania ne’e mós lori Deputadu sira-nia naran hato’o mós deskulpa ba PR relasiona durante vizita mosu maneira balun ladún di’ak hosi deputadu sira-ne’ebé akompaña vizita refere.
“Embora rona liafuan uitoan hosi deputadu sira, ha’u tenke mai husu deskulpa ba Prezidente Repúblika, lori Deputadu sira-nia naran ba hanesan maneira balun ne’ebé ita akompaña iha mídia loloos ladún di’ak,” nia dehan.
Jornalista : Nelson de Sousa
Editór : Cancio Ximenes
