OÉ-CUSSE, 28 jullu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretária Rejionál ba Asuntu Edukasaun Solidariedade Sosiál, prevee Orsamentu Jerál Estadu (OJE) 2022 hamutuk $48,000 ba akizisaun karreta funeráriu ida hodi fó atendimentu ba serbisu públiku iha rejiaun ne’e.
“Durante ne’e serbisu sosiál uza karreta funeráriu ida maibé nia kondisaun la garante ba atendimentu hotu kobre to’o sub-rejiaun sira, entaun autoridade deside tinan ne’e hola tán karreta foun ne’e atubele sustenta ida fali, tanba agora halo hela manutensaun tanba kondisaun aat, entaun gasta osan beibeik di’akliu aranja foun de’it atu garante serbisu la’o di’ak,” Sekretária Rejionál ba Asuntu Edukasaun Solidariedade Sosiál, Avelina da Costa, informa liuhosi telefónika, kinta ne’e.
Nia fó-sai katak, antes ne’e akontese karreta avaria, servisu sosiál prepara karreta hilux ida hodi fó atendimentu ba servisu funeráriu nian hodi tula mate-isin iha rejiaun ne’e, maibé hamosu lamentasaun iha komunidade.
Nune’e, autoridade tinan ne’e prevee orsamentu hamutuk rihun $48,000 sosa karreta foun ida, maibé ida tuan karik haree nia kondisaun la garantidu ona, autoridade sei halo lelaun tanba karreta ne’e uza tinan barak ona.
“Agora prosesu akizisaun ba konkursu ne’e publika ona, iha tempu badak empreza sei entrega ona ba autoridade atu hahú halo servisu funeráriu iha Oé-Cusse,” nia katak.
Xefe Departementu Solidariedade Sosiál no Inkluzaun RAEOA, Adelino Cau, informa antes ne’e komunidade barak mak lamenta no hato’o sentimentu hirus liuhosi mídia sosiál, kona-ba parte sosiál tula mate-isin iha karreta hilux.
Maibé parte sosiál mós prepara daudaun ne’e parte tékniku sira sei esforsu halo manutensaun to’o ikus hetan solusaun atu halo ona operasaun hanesan bainbain.
“Maibé ita orgullu tanba tinan ne’e autoridade aumenta tán karreta entaun sei fó apoiu tebes servisu sosiál nian iha funeráriu,” nia orgullu.
Entretantu, prosesu akizisaun ba karreta funeráriu ne’e fornese hosi empreza Sufnentimo Nafael Unipesoál Lda, ho valór hamutuk rihun $48,000 ho númeru konkursu RAEOA-ZEESM TLSRF/UAL/2022-030.
Jornalista : Abílio Elo Nini
Editór : Evaristo Soarés Martins
