DILI, 29 jullu 2022 (TATOLI)—Diretór Dirasaun Nasionál Transporte no Terrestre (DNTT), António da Costa, informa prosesu instalasaun ba semáforu foun tolu (3) iha área Audian parte Klinika Foho Osan Mean, ponte Kuluhun no iha Elemloi daudaun ne’e atinje ona 50%.
Notísia Relevante: Instalasaun semáforu foun iha Kuluhun-Audian-Manleu atinje ona 30%
“Instalasaun ba semáforu foun tolu ne’e, konforme kompañia informa ba ha’u katak prosesu ne’e agora to’o ona 50%, Signifika fiu agora sira dada ona no ai-riin kuandu sira harii tan la kleur lampu ne’e mai, monta ona,” António da Costa hateten ba Agência Tatoli iha nia kna’ar fatin, Dili, sesta ne’e.
Nia esplika, kompañia ne’ebé toma konta ba instalasaun semáforu foun tolu ne’e, dadaun sosa ona lampu iha Indonézia.
“Daudaun ne’e sira sosa ona (lampu ba instalasaun semáforu) no hein haruka mai de’it. Ne’ebé, hanesan iha terrenu ita-boot sira haree, aliserse iha ona, fiu dada ona no nia ai rin kuandu monta ona, signifika lampu sira mai ema hatun, monta ona,” nia dehan.
Diretór empreza Govnen Star, António da Silva Gouveia, hateten prosesu instalasaun ba semáforu foun tolu (3) iha Audian parte Klinika Foho Osan Mean, ponte Kuluhun no iha Elemloi foufoun sira-nia parte hasoru problema tanba propagasaun COVID-19.
“Instalasaun semáforu foun tolu ne’e, foufoun hahú ami iha problema tanba situasaun COVID-19 mak halo impedimentu. Nune’e, ikus mai ami haree situasaun komesa la’o normál ami hala’o fali servisu tuir nia lalaok ne’ebé iha. Tanba ne’e, agora ami komesa mai tau ona nia kanu hosi okos, fiu ami halo hotu ona no ami fui metin ona, agora hein nia riin to’o mai para monta, tau tan nia instalasaun sira hotu, nia funsiona normál ona,” nia dehan.
Kona-ba sosa sasán, nia dehan, sasán hirak ne’e kompañia sosa iha Indonézia, hanesan semáforu nia riin no nia lampu sira, maibé agora ne’e depende fali ba kondisaun transporte ne’ebé atu lori sasán sira-ne’e mai.
“Tanba, ekipamentu sira atu mai ne’e, ita depende fali ba transporte tasi nian, ita labele siik nia tempu. Se sasán sira ne’e to’o mai ona, ami bele monta no halo nia instalasaun,” nia esplika.
Jornalista : Nelia Fernandes
Editór : Cancio Ximenes
