MS-Embaixada Japaun inaugura postu saúde iha Soru
DILI, 29 jullu 2022 (TATOLI)—Ministra Saúde (MS), Odete Maria Freitas Belo, hamutuk Embaixadór Japaun iha Timor-Leste, Kinefuchi Masami, halo inaugura ba postu saúde Soru, iha postu adiministrativu Lospalos, munisípiu Lautem.
Biban ne’e, Ministra Saúde hato’o agradese ba Governu no povu Japaun liuhusi Embaixadór Japaun ne’ebé apoiu Ministériu Saúde hodi harii no konstrui tan Postu Saúde iha Suku Souro.
“Dahuluk, ha’u hakarak hato’o agradese barak ba ita-nia parseiru Governu Japaun ne’ebé Embaixadór iha ne’e ho inisiativa tomak ne’ebé mak konstrui sira mak halo la’ós Lospalos de’it maibé halo mós iha Munisípiu sira seluk,” Minsitra Saúde hateten liuhosi nota ne’ebé Agência TATOLI asesu, sesta ne’e.
Governu Japaun apoia hala’o konstruisaun fasilidade saúde, ekipamentu médiku, kapasita rekursu umanu, vasina no ai-moruk konsumivél sira ne’ebé hanesan máskara, hand sanitizer.
Governante ne’e hatete polítika Ministériu Saúde katak hakarak atu harii Postu Saúde ida-idak iha Suku ida-idak signifika iha suku 400-resin presiza iha Postu saúde.
“Iha Lospalos, ita iha suku 34 no agora ita iha Postu Saúde neen signifika katak ita sei presiza tan 20 resin, atu harii tan iha ita-nia suku sira, prontu neineik ho neineik ministériu saúde ita koko atu harii no ita mós la haluha ita-nia parseiru sira ne’ebé mak iha, lolo-liman ba ita atu bele kompleta nesesidade ne’ebé ita planeia hela iha ita-nia planu estratéjiku sira ne’ebé mak iha,” nia afirma.
Dezafíu ida mak ba postu saúde iha aldeia hitu ho nia populasaun totál 4.000-resin signifika katak inan-aman sira, ferik katuas sira la presiza la’o dook bá to’o iha Lospalos vila atu hetan asisténsia, maibé fatin ida-ne’e bele dada besik mai to’o iha ne’e.
Postu saúde no sentru saúde ne’ebé harii objetivu atu redus númeru mortalidade no redus númeru moras iha Timor-Leste, tuir polítika estratéjia Ministériu Saúde tanba ne’e hakbesik-an bá fasilidade saúde ne’ebé iha hodi simu informasaun kona-ba prevensaun no promosaun nian.
“Ita-boot sira iha direitu tomak atu hetan informasaun kona-ba moras no ita ko’alia kona-ba prevensaun katak ita tenke prevene ita-nia an antes atu moras, entaun ita-nia oan kiik sira ita tenke lori mai simu vasina, lori mai tetu sira asegura katak sira labele monu ba iha mánutrisaun,”nia sujere.
Inan isin-rua sira tenke mai konsulta, labele hein to’o atu besik tuur ahi mak mai ne’e sala, nune’e tenki mai hasoru malu ho enfermeiru, parteira sira dala-haat durante bebé iha kanotak.
Enkuantu Ministériu Saúde mós hato’o agradese ba Organizasaun Non Governamental HADEZTA ne’ebe nu’udar parseria di’ak ho Povu Japaun hodi harii ba konstrusaun Postu Saúde Souro.
Partisípa iha inagurasaun mak Administradór Munisípiu Lautem, Administradór Postu, Xefí Suku, Xefí Aldeia, Padre, ONG HADEZTA, PNTL, Veteranu sira, lia-nain, Diretór Jéral no Diretór Nasionál MS no seluk tan.
Jornalista : Felicidade Ximenes
Editór : Florencio Miranda Ximenes
