EKONOMIA, HEADLINE, MUNISÍPIU, OÉ-CUSSE (RAEOA)

RAEOA loke konkursu públiku ba ponte rua iha Oésilo-Nítibe

RAEOA loke konkursu públiku ba ponte rua iha Oésilo-Nítibe

Prezidente Autoridade RAEOA, Arsénio Paixão Bano. Imajen Tatoli/Francisco Sony.

OÉ-CUSSE, 29 jullu  2022 (TATOLI) –Autoridade Rejiaun Administrativa Espesiál Oé-Cusse Ambeno (RAEOA), hahú loke konkursu públiku ba emprezáriu lokál atu konkore hodi konstrui Ponte alternativa rua iha sub-rejiaun Oésilo no Nítibe iha tinan ne’e.

Ponte rua ne’e maka hanesan, ponte Bitopa lokaliza iha suku Usitasa’e, sub-rejiaun Oésilo no ponte Noetoko lokaliza iha suku Ban-Afi, sub-rejiaun Nítibe.

“Ponte Bitopa ho Noetoko sei halo iha tinan ida-ne’e, dezeñu buat sira hotu halo hotu tiha ona, tanba ne’e maka agora ita loke konkursu públiku, agora anúnsia ona konkursu públiku ba empreza sira atu kompete, sé mak manán sei hahú faze konstrusaun iha tinan ne’e,” Prezidente Autoridade RAEOA, Arsénio Paixão Bano, informa ba Agência Tatoli liuhosi telefónika, sesta ne’e.

Nia informa, ponte rua ne’e atu fasilita komunidade hosi sub-rejiaun tolu Oésilo, Pássabe no Nitibe, iha tempu udan bele asesu ba merkadu inklui lori hahán ba oan sira-ne’ebé hala’o estudu iha Pante Makasar.

Tuir nia, ponte Bitopa sei fasilita komunidade sira suku tolu iha Oésilo no suku rua iha sub-Pássabe. Enkuantu ponte Noetoko sei fasilita komunidade sira  suku lima iha sub-rejiaun Nítibe.

“Ponte rua ne’e atu fasilita mós ezekusaun ba estrada nasionál hosi Pante Makasar liga ba Nítibe, nomoos estrada nasionál hosi Pante Makasar suku Cunha liga ba sub-rejiaun Oésilo, Pássabe, tanba estrada nasionál Nítibe konkursu públiku hotu ona sei ezekuta hosi hosi Waskita Karya, no estrada nasionál Oésilo sei iha prosesu ba tenderizasaun,” nia informa.

Notísia relevante: Autoridade RAEOA prevee millaun $23 konstrui estrada hosi Pante Makasar to’o Nítibe

Jornalista: Abílio Elo Nini

Editór: Evaristo Soares Martrins

iklan
iklan

Leave a Reply

iklan
error: Content is protected !!