iklan

VIQUEQUE

Programa “Mão de Obra“ Postu Ossu prioritiza loke dalan alternativa ho metru kuaze 500

Programa “Mão de Obra“ Postu Ossu prioritiza loke dalan alternativa ho metru kuaze 500

Administrór postu Administrativu Ossu, munisípiu Viqueque, Sebastião Pereira Pires. Imajen Tatoli/Vitorino Lopes da Costa

DILI, 30 jullu 2022 (TATOLI) – Adiministradór Postu Ossu, Munisípiu Viqueque, Sebastião Pereira Pires, informa implementasaun Programa Mão de obra hosi Postu Adiministrativu Ossu sei fó prioridade hodi loke dalan alternativa ho metru kuaze 500.

“Ami trasa ona planu implementasaun ba mão de obra nian, sei prioritiza hodi loke dalan alternativa liga ba ami-nia postu kuaze metru 500 ba mosu iha fatin Asbere, Suku Ossu de Cima. Aleinde loke dalan alternativu ami Postu Ossu mós realiza limpeza merkadu Ossu no fatin istóriku relijiozu nian no ateru dalan iha postu adiministrativu ninia oin”, Adiministradór Postu Ossu, Sebastião hateten ba jornalista ajénsia Tatoli, via-telefone, sábadu ne’e.

Autoridade postu Ossu, hatutan planu loke dalan alternativa ho objetivu atu fasilita komunidade hosi Suku Builo, Uagia no Uabulu bele asesu. Tanba ne’e Postu Ossu hakarak tau prioridade ba programa mão de obra no planeamentu hodi loke dalan alternativu ne´e define hosi postu.

Enkuantu, implementa mão de obra ba suku 10 nian agora xefe suku sira maka submete sira nian programa liuhosi proposta mai postu, maka foin hatama ba Munisípiu Viqueque hodi aloka orsamentu hafoin implementa prioridade ne’ebé kada suku define ona.

“Implementasaun mão de obra ne’e postu nian mós define rasik no suku nian xefe suku sira maka define rasik, ne’ebé ha’u enkontru ona xefe suku na’in-10 iha Postu Ossu hodi hatama sira nia proposta mai postu maka postu lori ba hatama iha munisípiu”, autoridade akresenta.

Tuir nia, implementasaun programa mão de obra ba Postu Ossu sei realiza iha semana oin.

“Orsamentu mão de obra ne’ebé atu aloka mai ami Postu Ossu ho totál $ 120.166,33 hodi implementa programa ida ne´e mão de obra. Hosi orsamentu ne’e 5% ka $6.000,80 hela ba adiministrasaun postu no ninia restu maka ami jere ba atividade”, nia subliña.

Programa Mão de Obra mai hosi Governu liuhosi Ministériu Adiministrasaun Estatal (MAE) ho objetivu sentrál atu munisípiu, postu, suku no aldeia sira bele hala’o atividade sira ne’ebé bele kontribui ba polítika rekoperasaun ekonómia, ambiente moos, ambiente ida saudável no rezilielente.

Enkuantu implementasaun Mão de Obra iha Munisípiu Viqueque, Postu Viqueque vila hahú implementa ona iha suku.

Jornalista : Vitorino Lobes da Costa

Editór : Zezito Silva

iklan
iklan

Leave a Reply

iklan
error: Content is protected !!