BOBONARO, EKONOMIA, HEADLINE, MUNISÍPIU

Autoridade Bobonaro lansa programa PMOPA faze dahuluk

Autoridade Bobonaro lansa programa PMOPA faze dahuluk

Autoridade munisípiu Bobonaro lansa Programa Mão de Obra Postu Administrativu (PMOPA) faze dahuluk tinan fiskal 2022 iha postu administrativu Maliana. Imajen Tatoli/Sérgio da Cruz.

BOBONARO, 01 agostu 2022_(TATOLI) – Autóridade munisípiu Bobonaro, segunda ne’e halo lansamentu Programa Mão de Obra Postu Administrativu (PMOPA) faze dahuluk tinan fiskál 2022 iha postu administrativu Maliana, ne’ebé realiza iha suku Raifun.

Ativdade lansamentu iha postu administrativu Maliana ho totál suku hitu mak hanesan, Ritabou, Raifun, Lahomea, Holsa, Odomau, Saburai no Tapo-Memu, nune’e hala’o mós iha postu administrativu lima seluk hanesan, Atabae, Balibo, Cailaco, Bobonaro no postu administrativu Lolotoe.

Enkuantu VIII Governu konstituisonál implementa programa ne’e atu kapasita komunidade, empodera no hakbiit rekuperasaun ekonómika liuhosi atividade limpeza iha estrada rurál no urbana, hamoos valeta, ateru no taka estrada ku’ak hodi fasilita movimentasaun transporte públiku no atividade ekonomia.

Reprezentante prezidente autóridade munisípiu Bobonaro, Gizela Pirres, husu ba traballadór sira serbisu labele haree ba valór orsamentu ne’ebé governu prevee, maibé importante liu mak tenke iha resposnablidade no disiplina oras serbisu, nune’e implementasaun programa refere bele finaliza tuir tempu ne’ebé determinadu.

Nia apela ba koordenadór grupu sira iha munisípiu Bobonaro tomak atu tau matan ba  traballadór sira, serbisu labele haree ba kór no rasa, tanba liuhosi programa ne’e bele hamosu no haburas sentidu amizade no solidariedade ba malu.

“Imi hotu tenke aproveita didi’ak ba buat rahun sira-ne’ebé ita simu la’ós objetivu finál mak ida-ne’e, maibé oinsá ha’u-nia kontribuisaun nu’udar sidadaun,atu hamoos sidade, atu hatudu ezemplu di’ak ba ita-nia oan no bei-oan sira atu hela iha ambiente ne’eé mós no saudável,” nia hato’o iha intervensaun.

Administradór postu administrativu Maliana, Tomás Lacu-Loe, reforsa programa refere sei implementa uluk iha suku haat, maibé suku tolu seluk hanesan Holsa,Tapo-Memu no Saburai sei adia fali tanba ligadu ho prosesu kulturál balu.

“Ita labele obriga ohin loron sira halo fali serbisu tanba tuir ita-nia konstituisaun RDTL ita-nia lisan sira-ne’e hakarek ona iha artigu 2, entaun sira-nia parese ke semana oin mak foin hahú,” nia esplika.

Komandante PNTL munisípiu Bobonaro, Superintende Antoninho Mauluta, sei orienta membru sira atu koopera ho lideransa komunitária sira hodi fó seguransa másimu durante implementa programa ne’e to’o remata.

“Ita-nia liurai sira, aldeia no ofisiál polísia suku (OPS) sira sempre hamutuk ho imi tau matan ba imi-nia serbisu, haree mos ba imi-nia seguransa, bainhira imi serbisu iha grupu balu ne’ebé halo impendimentu imi tenke imforma kedas hodi halo atuasaun ruma,” nia fó hanoin.

Traballadór PMOPA hosi suku Riaifun, Irene Lúcia Tavares, sente kontente tanba liuhosi programa ne’e fó oportunidade ba feto no mane hodi bele hakbiit ona ekonomia família nian.

“Ha’u hakarak tama iha serbisu ida-na’e atu aprende serbisu, tanba dalan barak ema dehan mane mak serbisu maka’as, maibé iha tempu agora feto mós bele halo serbisu ne’ebé mane sira halo,” nia tenik.

Grupu traballadór iha postu administrativui Maliana hamutuk 14 ho totál traballadór na’in-280 no durasaun serbisu iha etapa dahuluk hamutuk loron 20.

Munisípiu Bobonaro hetan alokasaun orsamentu hosi Ministériu Administrasaun Estatál (MAE) ho montante  rihun $698-resin ($698.497,98) liuhosi Orsamentu Jerál estadu (OJE) tinan fiskál 2022.

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!