DILI, 01 agostu 2022 (TATOLI)–Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hasoru malu ho Primeiru-Ministru (PM), Taur Matan Ruak, segunda ne’e, hodi ko’alia kona-ba rai harii edifísiu foun ba Parlamentu Nasionál (PN).
“Informa ba Primeiru-Ministru kona-ba servisu iha Parlamentu, husu Governu atribui propriedade rai ba Parlamentu hodi harii futuru edifísiu foun. Entaun MAPKOMS, Ministru Finansa no Ministru Justisa hasoru malu ona ho Prezidente Parlamentu Nasionál no halo ona diskusaun, ikus mai iha ona solusaun katak rai ne’ebé atu uza harii futuru edifísiu Parlamentu maka iha Hera. Sira husu ektare 10, tanba ne’e Governu prontu ona aprezenta nune’e tempu badak sei halo atribuisaun,” Ministru informa hafoin hasoru Xefe Governu, iha Rezidénsia PM, iha Farol.
Nune’e, molok entrega sei halo uluk levantamentu tékniku ba propriedade Estadu ne’e.
“Tenke halo uluk levantamentu tékniku no saida mak atu halo ba komunidade ne’ebé karik okupa hela rai ne’e. Haree hela oinsá atu fó indemnizasaun maibé tenki iha dadus ne’ebé loloos atu nune’e bele fó solusaun loloos ba komunidade afetadu,” nia akresenta.
Notísia relevante: PN aprova fatin harii edifísiu própriu
Dadus provizóriu, uma-kain kuaze 200 mak afetadu, maibé dadus ne’e seidauk loos, tanba la’ós uma de’it maibé iha mós to’os no seluk tan.
“Identifika loos tiha hotu maka prevee orsamentu para selu indemnizasaun,” Ministru tenik.
Prezidente PN, Aniceto Guterres, hakarak tinan 2023 hatuur ona fatuk dahuluk, molok mandatu V Lejizlatura ramata.
Orsamentu ba estudu viabilidade hamutuk $500.000, ne’ebé prevee ona maibé orsamentu konstrusaun seidauk.
Jornalista : Antónia Gusmão
Editora : Julia Chatarina
