DILI, EDUKASAUN, HEADLINE, NASIONÁL

MAPKOMS husu UNTL utiliza livru foun sai referénsia ba estudante

MAPKOMS husu UNTL utiliza livru foun sai referénsia ba estudante

Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, akompaña hosi eskritór, Pedro Brinca, Dosente UNTL, Reprezentante Parlamentu Nasionál no Prezidente CI iha ámbitu lansamentu livru komunikasaun, iha salaun Liceu UNTL, segunda (01/08). Imajen Tatoli/António Daciparu

DILI, 01 agostu 2022 (TATOLI)—Ministru Asuntu Parlamentár Komunikasaun Sosiál (MAPKOMS), Francisco Martins da Costa Pereira Jerónimo, lansa livru ho títulu “A regulação da Comunicação sosial em Timor-Leste”, ne’ebé hakerek hosi Pedro Brinca, ne’ebé iha biban ne’e nia husu ba Universidade Nasionál Timor-Lorosa’e (UNTL) atu uza livru ne’e sai referénsia ba estudante sira.

“Se livru ne’e konsidera util duni maka tenke utiliza ho didi’ak, maibé kuandu livru ne’e konsidera util maibé hafoin lansa tiha maka la uza sei la vale buat ida. UNTL nu’udar instituisaun públiku ida, tanba ne’e tenke utiliza livru ne’e ba estudante sira nu’udar referénsia espesiál liu ba estudante sira iha departamentu komunikasaun sosiál,” Ministru hateten iha serimónia lansamentu livru iha salaun Liceu UNTL, segunda ne’e.

Notísia relevante: Lansamentu Livru Destinu Turístiku Ho Pájina 877

Biban hanesan, Diretór Sentru Estudu Kulturál no Arte hosi UNTL, Vicente Paulino, konsidera livru ne’e importante no serve duni ba ema hotu, liu-liu ba foin-sa’e sira ne’ebé maka dedika-an iha vida jornalizmu no mundu akadémiku, espesialmente ba estudante sira iha departamentu komunikasaun sosiál iha UNTL, Universidade Oriental de Timor-Lorosa’e (UNITAL) no Universidade Katólika Timorense (UCT, sigla portugés).

Livru foun ne’e kompostu hosi kapítulu lima, ne’ebé kapítulu dahuluk kona-ba enkuadramentu istóriku fahe ba parte sia kona-ba tempu Portugal nian hafoin mai to’o Brazil, kapítulu daruak kona-ba komunikasaun sosiál iha Timor-Leste ne’ebé hahú hosi konsulta populár mai to’o ohin loron.

Nune’e mós, kapítulu tolu, hakerek kona-ba enkuadramentu teórika ne’ebé fahe ba parte lima kona-ba regulasaun, auto regulasaun no mós governasaun ba mídia, kapítulu haat ko’alia kona-ba polítika governasaun ne’ebé fahe ba parte rua no ikus liu kapítulu lima kona-ba lejizlasaun ba mídia espesialmente artigu iha Konstituisaun Repúblika Timor-Leste kona-ba liberdade imprensa.

Tuir Vicente, livru ne’ebé autór hakerek ne’e halo análiza krítika ba iha elementu nesesáriu asosiadu regulasaun lei komunikasaun ne’e rasik no halo análiza komparativa kona-ba komunikasaun sira ne’ebé maka iha nasaun PALOP inklui Timor-Leste, Cabo Verde, Mozambique no Macau, maski Macau rasik la pertense ona iha nasaun PALOP maibé bele klasifika nafatin nu’udar elementu fundamentál ida tanba nasaun ne’e uluk hola parte iha ne’ebá.

Bainhira Autór, Pedro Brinca hakerek livru ne’e, hafoin halo aprezentasaun, nia sente iha diferensa buat balun kona-ba konstituisaun ne’ebé hatuur iha artigu 41 ne’ebé hateten iha kapítulu lima ikus ne’ebé hateten kona-ba Lejizlasaun ba mídia espesialmente artigu iha Konstituisaun Repúblika Timor-Leste kona-ba liberdade imprensa kopia hotu de’it hosi Portugal nian, maibé iha pontu ne’ebé mak halo diferensa entre Timor-Leste ho lei komunikasaun sosiál nasaun PALOP nian hanesan extensaun no buat seluk tan.

“Ha’u fiar katak livru ne’e sai referénsia ida ba jornalista sira no estudante sira ne’ebé maka estuda iha área komunikasaun sosiál, nune’e mós ba sira ne’ebé maka hakarak hatene ka hakle’an ninia koñesimentu liu-liu kona-ba lei komunikasaun ne’e rasik,” nia tenik.

Livru ne’e hetan apoiu hosi Sentru Estudu Arte no Kultura, ne’ebé sai hanesan autór ba publikasaun hodi fó hanoin ba UNTL ba iha li’ur ho ninia edisaun rasik.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!