HEADLINE, SAÚDE

MS kompromete mellora prestasaun no asisténsia kuidadu saúde iha TL

MS kompromete mellora prestasaun no asisténsia kuidadu saúde iha TL

Prezidente da Republika Ramos Horta akompana hosi Ministra Saude no Vice Ministru bainhira halo primeira vizita ba SAMES hodi haree no observa diretamenta ai-moruk iha armajen SAMES iha kampung Alor Dili, segunda 1 agostu 2022.Imajen Tatoli/Antonio Daciparu

DILI, 01 agostu 2022 (TATOLI)—Vise Minsitru Saúde, Bonifacio “Maucoli” dos Reis, informa Governu iha kompromisu atu mellora prestasaun no asisténsia kuidadu saúde ba iha territóriu laran tomak, liuliu atensaun espesiál ba área remota.

Vise Maucoli hato’o asuntu ne’e, bainhira Prezidente Repúblika, José Ramos-Horta, hala’o vizita ba edifísiu Servisu Autónomu Medikamentu no Ekipamentu Saúde (SAMES), Institutu Públiku, hodi haree diretamente kondisaun armazein nasionál no medikamentu sira.

“Ministériu Saúde iha kompromisu atu mellora prestasaun no asisténsia kuidadu saúde ba iha territóriu laran tomak ho espesiál atensaun ba área remota no kamada populasaun ne’ebé desfavoresidu,tuir prinsípiu inkluzaun, ekuidade, efisiénsia no kualidade ba ema hotu,” Vise MS hateten iha Kampu-Alór-Dili, sesta ne’e.

Planu Estratéjiku Nasionál iha Setór Saúde ba edisaun daruak 2021 to’o 2030 hatur ona ho motto katak “Populasaun Timor-Leste Saudavél mak Timor-Leste ida ne’ebé Saudavel”.

Nune’e, Governante ne’e dehan atubele iha ekuidade tenke iha ekilíbriu ba infraestrutura, rekursu umanu, rekursu finanseiru, medikamentu no ekipamentu médiku no naun médiku ne’ebé presiza atubele providénsia asisténsia saúde ho dignu, profisionál no tuir padraun ba komunidade.

Alende ne’e, Sistema Nasionál Saúde presiza iha dezempeñu ba servisu lojístika farmaseútika ho autonómu adekuada, kompetente no efisiente, hodi garante abastesimentu ba medikamentu no ekipamentu saúde no médiku ho kualidade iha Instituisaun ba Prestasaun Kuidadu Saúde iha nivél kuidadu tersiáriu, sekundáriu no primáriu iha Timor-Leste laran tomak.

Governu Timor-Leste liuhusi Dekretu-Lei númeru 18/2015, 24 juñu, estabelese Servisu Autonómo Medikamentu no Ekipamentu Saúde ho autonomia administrativa, finanseira no patrimóniu rasik, ne’ebé responsabiliza ba produsaun, importasaun, armazenamentu no distribuisaun ba produtu farmaseútika no ekipamentu saúde ba Sistema Nasional Saúde tomak.

Nune’e mós liuhusi Diploma Ministérial númeru 36/2020, 8 outubro, primeira alterasaun ba Diploma Ministérial núemeru 21/2016, 9 marsu, ne’ebé estabelese Regulamentu Internu ba SAMES.

Maibé, Governante ne’e rekoñese durante SAMES nafatin enfrenta dezafiu partikularmente ligadu ba rekursu umanu, rekursun finaseiru, produsaun no importasaun.

SAMES seidauk iha kapasidade atu halo produsaun ba Produtu Farmaseútika Rasik iha Timor-Leste no enfrenta difikuldade iha Importasaun, tanba SAMES depende totalmente ba Produsaun Medikamentu no Produtu Farmaseútika hosi rai li’ur liuhusi prosesu jestaun no aprovizionamentu. No dalaruma bele akontese estoke menus iha armazein SAMES sentrál, rejionál no mós iha nivél prestasaun sira.

Maibé, Vise Maucoli dehan kondisaun sira-ne’e la taka dalan ba SAMES no Ministériu Saúde atu bele prenxe nesesidade farmaseútika no medikamentu iha nível kuidadu primáriu, sekundáriu no tersiáriu liuliu ba armazenamentu no distribuisaun.

MS estabelese armazein rejonál tolu

Biban ne’e, Governante ne’e informa atu fasilita no responde distribuisaun medikamentu no produtu farmaseútika sira, SAMES no Ministériu Saúde konstrui no estabelese ona armazein rejional tolu maka hanesan armazein rejionál Baucau, Maliana no Ainaro.

Nune’e, armazein Sentrál Dili, fó kobertura no asisténsia ba Munisípiu Dili, Aileu, Liquiçá, no Rejiaun Administrativa Espesial Oé-cusse no Ambeno (RAEOA), Armazein Rejionál Baucau, kobre Munisípiu Baucau, Lautem, Manatuto no Viqueque, Armazein Rejionál Ainaro kobre Munisípiu Ainaro, Covalima no Manufahi no ikus liu maka Armazein Rejionál Maliana kobre Munisípiu Bobonaro no Ermera.

Kona-ba rekursu umanu iha Ministériu Saúde no SAMES sei enfrenta hela númeru adekuadu ba prense ba vaga no kualidade ba pesoál sira tuir sira-nia área espesializasaun tantu iha nivél SAMES Sentrál no Rejionál hodi bele hala’o mákina funsionamentu SAMES ho didi’ak.

“Hakarak mós atu informa katak. SAMES mós durante ne’e hetan apoiu maka’as husi ita-nia parseiru dezenvolvimentu, ajénsia nasoens unidas no doador sira em termus ba formasaun no dezenvolvimentu rekursus umanus, informasaun no teknolojia no finansiamentu,” nia afirma.

Entretantu, Diretór Servisu Autónomu no Medikamentu no Ekipamentu Saúde (SAMES), Santana Martins, afirma durante ne’e SAMES hetan difikuldade iha orsamentu atu halo kompra ba medikamentu.

“Ami hasoru difikuldade durante situasaun COVID-19 tanba presu aimoruk aumenta, entaun ami servisu maka’as hodi garante disponibilidade tomak ba medikamentu iha fasilidade saúde sira,” nia preokupa.

Jornalista : Felicidade Ximenes

Editór        : Florencio Miranda Ximenes

iklan
iklan

Leave a Reply

iklan
error: Content is protected !!