iklan

NASIONÁL, POLÍTIKA

Pesoál saneamentu 33 hala’o limpeza iha jardin Cristo Rei Fatucama

Pesoál saneamentu 33 hala’o limpeza iha jardin Cristo Rei Fatucama

Paisajen iha rai-henek mutin Cristo Rei. Imajen Tatoli/Egas Cristóvão

DILI, 01 agostu 2022 (TATOLI)—Administradór Cristo Rei, Munisípiu Dili, Venancio Tavares, informa autoridade postu administrativu koloka pesoál saneamentu na’in-33 mak durante ne’e hala’o limpeza iha jardin Cristo Rei Fatucama, Dili.

Notísia Relevante: AMD kontrata ona pesoál limpeza 112 hamoos jardin kapitál – TATOLI Agência Noticiosa de Timor-Leste

“Ita iha pesoál saneamentu 33 ne’ebé mak durante ne’e halo limpeza iha jardin Cristo Rei no dadaun ne’e sira-nia servisu la’o di’ak hela. Dala ruma ita observa dehan ema la servisu, maibé loloos ne’e ema hamoos mós sira la’o so’e foer la tau iha nia fatin no soe arbiru de’it. Tanba ne’e, ema balun kestiona dehan ema la servisu maibé loloos pesoál saneamentu sira hala’o servisu hodi halo limpeza iha Cristo rei,” Venancio Tavares hateten ba Agência Tatoli, iha nia knar fatin Becora, Dili, segunda ne’e.

Nia esplika, pesoál 33 ne’ebé limpeza iha jardin Cristo Rei ne’e fahe ba grupu tolu (3) mak grupu ida hala’o limpeza iha jardin Cristo Rei, grupu daruak hala’o limpeza iha esgotu suku laran no grupu ikus limpeza iha tasi ibun jardin Prezidente BJ-Habibie to’o Cristo Rei.

“Ba ita-nia pesoál sira-ne’ebé limpeza iha tasi ibun, sira hamoos foer ne’ebé ita-nia komunidade sira ba kaer ikan soe karik sira hamoos, nune’e ita haree ambiente iha tasi ibun moos no furak,” nia dehan.

Entretantu, iha tinan ne’e Governu, liuhosi Autoridade Munisípiu Dili rekruta pesoál iha postu administrativu haat (4) hanesan postu administrativu Don Aleixo iha na’in-39, Cristo Rei na’in-33, Vera Crúz na’in-20 no Nain Feto na’in-20, ne’ebé sira-nia servisu durante fulan sia (9) nia laran hahú hosi abril to’o dezembru tinan 2022.

Enkuantu, programa pesoál limpeza sidade ka limpeza jardin, Autoridade Munisípiu Dili, liuhosi Sekretáriu aloka orsamentu hamutuk $115,920.00, hodi rekruta pesoál iha postu administrativu haat ne’ebé pertense ba munisípiu Dili (4).

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!