COVALIMA, 01 agostu 2022 (TATOLI)–Diretór Interinu Servisu Saúde Munisípiu Covalima, Agapito de Jesus informa, Servisu Saúde Munisípiu Covalima husu ministériu saúde (nasionál) atu konfirma pagamentu subsídiu liña frente ba profisionál saúde iha postu Saúde Ogues, Has-ain no Matai, postu administrativu Maucatar, munisípiu Covalima iha Ministériu Finansas (MF).
“Ha’u atu dehan hanesan ne’e, ita-ko’alia bele asesu ho fasil maibé nia-prosesu ho tempu maske agora daudaun halo ona pagamentu seidauk kompletu. Ha’u mós husu ona sira atu halo print out resivu hosi banku, nune’e ita husu nasionál atu konfirma iha Ministériu finansa,” Agapito de Jesus hato’o ba Agência Tatoli, iha Resintu AMC, Sukaer-Laran, segunda ne’e
Maske Governu halo ona pagamentu subsídiu liña frente ba profisionál saúde sira-ne’ebé presta sira-nia servisu durante iha situasaun pandemia COVID-19 la kompletu maibé la signifika sira-nia direitu lakon.
Tuir dekretu-lei Governu númeru 17/2020, 30 agostu, ne’ebé halo segundu alterasaun hosi Konsellu Ministru hodi deklara katak “O Conselho de Ministros aprovou a segunda alteração ao Decreto-Lei nú 17/2020, de 30 de abril, que cria um suplemento remuneratório para os funcionários, agentes e trabalhadores da administração pública que prestem a respetiva atividade profissional nos serviços de prevenção ou controlo da COVID-19, ou em condições de direta exposição ao vírus SARS-CoV-2.
Ho nune’e, Governu prepara óubsídiu remuneratóriu ba servisu liña frente sira inklui mós pesoál saúde sira hola parte iha servisu ida-ne’e ho valor suplementu remuneratóriu tuir kategoria sira hanesan ba pesoál saúde servisu administrasaun kada-loron sei hetan $15, tékniku profisionál saúde Médiku, Emfermeiru/a, Parteira no tékniku aliadu sira kada loron sei hetan $20.00.
Enfermeira postu Saúde Ogues, Zeferina de Jesus informa, servisu saúde Covalima rekolla ona print out esteitmentu banku iha loron 25 jullu ne’e, maibé to’o ohin loron seidauk iha informasaun ne’ebé mak fiksu ba sira.
Antes ne’e, iha loron 22 jullu tinan ne’e pesoál saúde sira kosidera Governu halo pagamentu subsídiu liña frente ba pesoál saúde sira hamosu diskriminasaun tanba pagamentu subsídiu liña frente ba pesoál saúde hosi postu saúde Ogues, Matai ho Has-ain pagamentu la tuir lei.
Razaun Governu liuhosi Ministériu Saúde hamosu diskriminasaun, tanba haree ba valor pagamentu subsídiu liña frente ba pesoál limpeza no pesoál seguransa boot-liu hosi tékniku profisionál saúde tanba sira hetan valór orsamentu $2900.
Jornalista : Celestina Teles
Editór : Cancio Ximenes
