VIQUEQUE, 02 agostu 2022 (TATOLI)–Banku Sentrál Timor-Leste (BCTL-sigla portugés), tersa ne’e, halo introdusaun kona-ba pagamentu dijitál ba autoridade no funsionáriu sira iha postu administrativu Uatulari, munisípiu Viqueque.
“Pagamentu dijitál hanesan programa nasionál ka kampu dijitál. Banku Sentrál kolabora ho instituisaun finanseiru hodi introdús iha Maubisse iha tinan-rua liubá, atu lori servisu finanseiru báziku liuliu pagamentu dijitál no pontu asesu hakbesik ba ita-nia komunidade iha área rurál, pelumenus bainhira sira foti saláriu bele besik liubá sira,” Vise-Governadór BCTL asuntu sistema pagamentu nasionál, Venâncio Alves Maria, hateten iha postu administrativu Uatulari, tersa ne’e.
Notísia relevante: BCTL promove pagamentu dijitál dahuluk iha Maubisse
Aleinde ne’e, objetivu atividade diseminasaun maka atu fahe informasaun ba entidade komérsiu, veteranu, funsionáriu públiku no komunidade atu kompreende no utiliza servisu finanseiru no pagamentu dijitál ne’ebé disponível ona iha Timor-Leste.
Pagamentu dijitál implementa ona maibé daudaun kontinua ho programa diseminasaun atu fahe informasaun ba komunidade.
“Funsionáriu sira iha postu Baguia sira asesu ona pagamentu dijitál no sira la ba foti saláriu iha Baucau, maibé ami husu setór privadu sira ne’ebé halo negósiu bele kolabora ho instituisaun finanseru sira hodi fasilita pagamentu ba ita-nia maluk sira ne’ebé hakarak foti osan hosi Baguia no Uatulari. Tanba ne’e halo disemisaun hanesan parte ida hosi implementasaun pagamentu dijitál, nune’e ami sei halo atividade ne’e iha Timor laran tomak,” nia akresenta.
Kritériu asesu pagamentu dijitál ne’e tenki iha konta bankária, konta mosan hosi Telemor no TPAY Telin Digitál Solution (TDS) hosi Telkomcel.
“Ita hakarak asesu ba ita-nia osan agora la presiza bá banku, maibé banku iha ita-nia bolsu, halo koneksaun karteira eletrónika hodi asesu ba pagamentu ne’ebé besik ba funsionáriu sira,” nia tenik.
Nune’e, BCTL husu ba komunidade no funsionáriu sira tenki buka hatene kona-ba pagamentu dijitál.
Horiseik BCTL hala’o diseminasaun iha postu Uatucarbau no ohin kontinua iha postu Uatulari, aban sei kontinua iha postu Baguia.
Iha fatin hanesan, Administradór postu Uatulari, Manuel do Rosário, apresia ho inisiativa BCTL tanba mai fasilita ona funsionáriu sira.
“Ha’u sente kontente no agradese ba BCTL ne’ebé fasilta funsionáriu sira asesu ba pagamentu dijitál. Pagamentu dijitál ne’e atu funsionáriu sira labele bá foti osan iha munisípiu tanba bá munisípiu gasta tempu no husik serbisu maka foin bá foti saláriu. Pagamentu dijitál maka implementa iha Uatulari, ha’u sente di’ak liu,” Autoridade postu dehan.
Jornalista : Vitorino Lopes da Costa
Editora : Julia Chatarina
