HEADLINE, MUNISÍPIU, OÉ-CUSSE (RAEOA), POLÍTIKA

Benefisiáriu bolsa da mãe jerasaun foun RAEOA sei simu subsídiu iha agostu

Benefisiáriu bolsa da mãe jerasaun foun RAEOA sei simu subsídiu iha agostu

Koordenadór programa bolsa da mãe jerasaun foun iha RAEOA, João Bano Suni. Imajen Tatoli/Abílio Elo Nini.

OÉ-CUSSE, 02 agostu  2022 (TATOLI) – Benefisiáriu bolsa da mãe jerasaun foun komposta hosi inan isin-rua, labarik no labarik defisiénsia hamutuk na’in-1.807 iha rejiaun Administrativa Espesiál Oé-Cusse Ambeno (RAEOA) sei simu subsídiu faze dahuluk hosi Governu iha fulan-agostu tinan ne’e.

Koordenadór programa bolsa da mãe jerasaun foun iha RAEOA, João Bano Suni, esplika, lansamentu programa bolsa da mãe jerasaun foun iha RAEOA akontese iha 17 juñu tinan ne’e, no prosesu rekollla dadus hahú iha 20 juñu to’o loron 30 jullu konsege rejista benefisiáriu 1.807

“Benefisiáriu hirak-ne’e komposta hosi inan isin-rua 290, tanba aprovadu atu hetan subsídiu, labarik 1.734 no labarik ho defisiénsia na’in-tolu, ne’ebé totál hamutuk 1.807 mak benefisiáriu iha pagamentu faze dahuluk sei akontese iha agostu ne’e,” João Bano Suni, informa ba Agência Tatoli iha Oé-Cusse, tersa ne’e.

Tuir nia, prosesu rejista benefisiáriu ba programa bolsa da mãe jerasaun foun ne’e, realiza kada fulan ida, presiza halo arollamentu ba fulan ida, depois halo pagamentu ba fulan oin, enatun  kuandu rejista iha fulan juñu sei hetan pagamentu iha fulan jullu maibé prosesu tarde uitoan tanba sei presiza halo lansamentu entaun adianta ba agostu ne’e.

“Maibé bazea dadus seluk ne’ebé maka rekolla hosi fulan-jullu, agora tama ona iha prosesu arollamentu iha munisipál no nasionál, entaun dadus atu hetan pagamentu sei mai iha fulan-agostu, maibé pagamentu sei la’o ho fazeadamente,” nia katak.

Nia akresenta, atividade rejistrasaun ba programa ne’e, Ministériu Solidariedade Sosiál no Inkluzaun (MSSI) destaka ona ofisiál sira hamutuk na’in-25 atu rekolla dadus kada loron iha  postu saúde no sentru saúde iha territóriu Oé-Cusse ba benefisiáriu sira, inan isin-rua no labarik tanba programa ne’e serbisu hamutuk ho Ministériu Saúde, Ministériu Justisa no Ministériu Administrasaun Estatál (MAE).

Nune’e kona-bá kaléndariu pagamentu parte nasionál sei komunika ho autoridade RAEOA tanba prosesu pagamentu ba benefisiáriu sira sei liuhosi Telcomsel, maibé sei halo uluk abertura lansamentu tanba programa ne’e foin implementa iha munisípiu tolu iha Timor-Leste.

Responsável ne’e fundamenta, obstákulu ne’ebé ofisiál sira enfrenta iha terrenu, maka dokumentu komprovativu sidadaun nian, hanesan sertidaun RDTL no kartaun eleitorál balu seidauk iha, maibé problema ne’e, parte MSSI submete ona ba iha Ministériu Justisa atu rezolve tuir mekanizmu ne’ebé iha.

Bazea mata dalan hosi Governu liuhosi MSSI valór subsísiu ba inan isin-rua hetan $15 kada fulan to’o partu, no bainhira bebé ida moris to’o tinan tolu hetan subsídiu $20 kada fulan, no inan ne’e la hetan ona subsídiu maibé bebé  mak hetan no estende to’o tinan neen (6).

Programa ne’e MSSI serbisu hamutuk ho Ministériu Saúde atu sidadaun hotu-hotu bainhira isin-rua tenke asesu ba fasilidade saúde hodi hetan atendimentu, nune’e bainhira deteta rezultadu hatudu pozitivu isin-rua sei rejista iha sistema programa bolsa da mãe jerasaun foun.

Notísia relevante: Implementa “Bolsa da Mãe Jerasaun Foun”, MSSI husu adisionál millaun $6

Jornalista   : Abílio Elo Nini

Editór         : Evaristo Soares Martins

iklan
iklan

One Comment

  1. oinsa ho programa bolsu de mae,
    tamba hamosu fali bolsu jerasaun foun.
    programa ida sidauk hotu ita kria tan programa foun ida ne’e.
    husu ba ekipa komisaun bele rezolve lalais programa ida bolsu de mae lalais.
    obrogado.

Leave a Reply

iklan
error: Content is protected !!