DILI, POLÍTIKA

Governu konsidera informasaun mina laiha ne’e ‘Hoax’

Governu konsidera informasaun mina laiha ne’e ‘Hoax’

Kompradór kombustivel iha estasaun kombustível Mega Petroleum, iha Fatuhada Dili, kinta (28/07). Imajen Tatoli/Francisco Sony.

DILI, 02 agostu 2022 (TATOLI)—Governu liuhosi Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara, konsidera informasaun ne’ebé espalla iha territóriu laran tomak katak mina ka kombustívdl laiha ona iha loron hirak liuba ne’e lia-falsu ka ‘Hoax’ de’it.

Notísia Relevante: PM Taur husu labele pániku, mina litru millaun haat to’o ona TL

Sekertáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Francisco Sony

“Ohin mós foti informasaun uitoan, ami mós bele dehan hoax liga ba mina iha rai-laran dehan hotu ka iha problema. Ida-ne’e hoax tanba ne’e mak ita-nia Primeiru-Ministru depois hasoru Prezidente Repúblika mai halo kedas deklarasaun fó hanoin kedas ba públiku lalika pániku inklui dehan mós ba Prezidente Repúblika atu lalika preokupa,” Merício Akara ko’alia hodi hatán ba deputadu sira iha reuniaun plenária komisaun permanente iha Parlamentu Nasionál (PN), tersa ne’e.

Tanba informasaun mina laiha ne’e hanesan hoax ka lia faslu, nune’e Primeiru-Ministru halo duni deklarasaun hodi klarifika ba públiku katak ida-ne’e laiha problema.

Prezidente Komisaun C trata asuntu Finansa Públika iha PN, Maria Angelica Rangel, hateten komisaun iha protófoliu hodi haree kestaun ne’e, nune’e iha semana kotuk halo duni observasaun direta iha terrenu hodi haree polémika ne’ebé la’o iha sosiedade nia leet.

“Loos duni ami iha semana kotuk kuiñesimentu verbal mós ba Prezidente Parlamentu Nasionál katak ami tenke tun ba haree mina ne’ebé sai hanesan polémika iha ita-nia sosiedade nia laran, tanba kestaun mina ita iha grupu balun polítiza iha ita-nia sosiedade ida-ne’e katak mina maran,” nia dehan.

Tanba tuir komisaun nia haree bainhira to’o iha kompañia mina ne’ebé fornese mina mai Estadu ida mak hanesan pertamina hanesan kompañia estatál estranjeiru ida iha ne’e no ida mak ETO, no komisaun to’o iha ne’eba kestaun sira-ne’ebé sai preokupasaun pertamina labele sai tanba ema halo antrian iha ETO nia abastamentu kombustível tanba dehan mina laiha.

“Maibé hakarak ko’alia iha ne’e katak ró ne’ebé lori embarka mina pertamina nian atu hatama ne’e tama tiha ona kalan. Iha dadeersan ami to’o iha terrenu husu ema ka funsionáriu iha pertamina katak tuir loos tuku 09h00 oras servisu. Ministériu Finansa iha dirasaun customer ninian tenke ba verifika ona ró tama katak ró ne’e tula tonelada no presu hira, atu nune’e  sira bele loké segel nune’e pertamina bele hatama sira-nia mina mai iha sira-nia tanke sira atu nune’e fornese mai ita-nia rai. Maibé defaktu katak ema telefone ba customer sira dehan ami-nia mina no karreta laiha to’o meudia mak sira foin sira ba foti hodi loke mina ne’e,” nia dehan.

Nia parte hakarak ko’alia loloos ida-ne’e hanesan politizasaun halo populasaun iha Timor laran tomak pániku.

Nune’e, daudaun ne’e komisaun permanente sei bolu Ministru Finansa, Ministru Petróleu no Minerá ho nia autoridade sira-ne’ebé liga ba iha mina no custom tanba kestaun ne’e iha protofóliu komisaun C hodi halo fiskalizasaun nune’e husu informasaun liga ba mina.

Jornalista  : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!