KSI-KJRDN avalia servisu atende vítima dezastre naturál
COVALIMA, 02 agostu 2022 (TATOLI)–Organizasaun Noun Governamentál (ONG) Kadalak Sulimutuk Institutu (KSI) hamutuk Komisaun Jestaun Risku Dezastre Naturál (KJRDN) hala’o avalisaun servisu atendimentu ba vítima dezastre naturál sira iha munisípiu Covalima.
“Atividade ohin ko’alia kona-ba servisu ne’ebé mak Kadalak Sulimutuk Intitutu (KSI) hakna’ar an ba liga ho asuntu dezastre naturál tanba ami iha progresu lubuk no hasoru dezafiu. Ami hamutuk iha ne’e atu fahe imformasaun hodi tau idea hamutuk hodi buka solusaun, nune’e desizaun bele han malu ho situasaun komunidade iha baze,” Vise Diretór KSI, Pedro Brito Fernandes, hateten ba jornalista sira iha salaun Sentru Solidariedade Sosiál no Inkluzaun iha Suai Loro, tersa ne’e.
Tanba, nia dehan, durante ne’e autoridade iha postu administrativu no iha suku balun mós kestiona kona-ba baze legál ba asuntu dezastre naturál.
Maske durante ne’e hasoru dezafiu haree-liu ba iha parte esternu mak hanesan dezafiu mak foti dadus iha terrenu bainhira akontese dezastre naturál tanba haree ba kondisaun estrada aat relasiona ho mudansa klimátika ne’ebé foin lalais ne’e akontese inundasaun iha fatin-fatin inklui mós iha munisípiu Covalima hodi estraga komunidade nia ai-han iha toos no natar
Tanba ne’e, Kadalak Sulimutuk Institutu (KSI) servisu hamutuk ho autoridade no Servisu Munisipál Protesaun Sivil no Servisu Jestaun Risku Dezastre Munisipiu Covalima hala’o enkontru ho parseiru no intituisaun relevante sira.
Enkontru ne’e hala’o ho objetivu atu fahe informasaun ba progresu no dezafiu servisu liga ho reativa fali estrutura Konsellu Jestaun Dezastre hosi nivél postu no suku ne’ebé durante ne’e parseiru halo kna’ar ba.
Reprezentante Adminitradór Munisípiu Covalima, Francisco de Jesus Alves reforsa, Kadalak Sulimutuk Institutu Realiza enkontru hamutuk ba intituisaun relevante sira ne’e hanesan pasu di’ak hodi hamosu ideia hodi responde dezastre naturál ne’ebé akontese iha futuru.
“Ha’u hanoin enkontru ida-ne’e pasu di’ak ba intituisaun relevante-sira hodi hamosu ideia planu foun oinsá mak bele responde dezastre naturál bele atende di’ak liután,” nia informa.
Iha biban ne’e autoridade mós orienta ba Ekipa Jestaun Risku Dezatre Naturál atu prepara politíka levantamentu dadus ba sidadaun ne’ebé vítima ba dezastre naturál labele jeneraliza sidadaun hotu sai vítima tanba atu hetan apoiu hosi Governu no ONG sira.
“Ha’u orienta-ona ba-sira atendimentu dezastre naturál labele ohin akontese dezastre naturál halo atedimentu ohin de’it. Ita tenke iha planu antes no akontese dezastre hafoin ne’e, ita tenke prepara polítika di’akliu halo levantamentu dadus vítima dezastre naturál,” nia dehan.
Jornalista : Celestina Teles
Editór : Cancio Ximenes
