DILI, POLÍTIKA

Membru PN preokupa populasaun RAEOA liuhosi Kefamenanu husu vistu iha Motain

Membru PN preokupa populasaun RAEOA liuhosi Kefamenanu husu vistu iha Motain

Plenária Parlamentu Nasionál. Imajen Tatoli/António Gonçalves.

DILI, 02 agostu 2022 (TATOLI)-Membru Parlamentu Nasionál (PN), Deputada Fernanda Lay, preokupa populasaun Rejiaun Administrativa Espesiál Oé-Cusse Ambeno (RAEOA) atu hakat liu fronteira liuhosi Kefamenanu territóriu Indonézia nian mai husu vistu iha Mota Ain.

“Ha’u lamenta tebes funsaun MNEK tanba sidadaun sira Oé-Cusse atu sai liu hosi Kefamenanu sira tenke mai husu vistu iha Mota Ain como e possivel kooperasaun ho Indonézia ema Indonézia tama ba Oé-Cusse bele trata ita-nia fronteira tanbasá mak ita-nian atu sai tenke mai Mota Ain,” Deputada CNRT ne’e levanta iha reuniaun plenária komisaun permanente iha PN, tersa ne’e.

Nune’e, nia dehan, presiza hanoin kooperasaun tenke iha benefísiu mutua labele ba parte ida de’it, ho ida-ne’e komisaun B trata asuntu Negósiu Estranjeiru, Defeza no Segurasan iha PN no  Governu liu-liu  Ministéiru Negósiu Estranjeiru no Kooperasaun (MNEK) atu tau matan.

Enkuantu iha reuniaun plenária komisaun permanente ne’e, Deputadu KHUNTO, Luis Roberto, levanta mós kestaun ajénsia sira-ne’ebé faan billte aviaun nian ba timoroan sira atu ba rai-li’ur.

“Husu nafatin ba Governu atu kontrola ita-nia ajénsia internasionál sira-ne’ebé faan billete iha Timor-Leste kona-ba viajen ninian tanba ita-nia ema joven barak mak sosa billete ne’e atu ba Europa, dalaruma to’o iha dalan klaran ema hapara sira. Ezemplu, foin daudaun iha joven na’in-10 ne’ebé ema tahan iha Malázia ne’eba deporta fila mai Bali-Indonézia depois mai fali Timor,” nia dehan.

Tanba, nia dehan, ajénsia faan billete sira-ne’e mak fó garantia ba sira katak sosa billete ne’e sei to’o iha nasaun destinasaun maibé ikus mosu problema, nune’e hanoin Governu presiza kontrola.

Kestaun seluk, mós reprezentante povu sira levanta kona-ba problema insfraestrutura bázika iha rai-laran.

Deputadu CNRT, Domingos Lemos, dehan estrada ligasaun munisípiu ba postu administrativu sira hanoin iha tempu bailoron agora presiza Governu haree situasaun rezolve lalais antes udan monu rai.

Tanba fulan hirak liuba hosi rezultadu udan ne’ebé mak la para, feta ba estrada barak mak aat maibé to’o agora realidade seidauk iha manutensaun ba estrada sira-ne’e.

Deputada PD, Elvina de Sousa, hateten depois halo fiskalizasaun ba munisípiu barak nota katak estrada ligasaun ba hosi munisípiu ida ba postu administrativu iha territóriu laran tomak ne’ebé mak presiza atu hadi’a hodi fasilita komunidade nia movimentu.

Nia dehan, hanesan iha postu administrativu balun iha ponténsia turístika ezemplu hanesan ba iha Atsabe ba Letefoho, inklui iha Lore-Lospalos.

“Maibé dalan durante ne’e ita ko’alia beibeik atu bele hadi’a maibé seidauk hela de’it, tan ne’e hanoin Governu iha dever atu hadi’a ligasaun estrada ba iha postu iha territóriu tomak neineik la’os halo hotu dala ida, nune’e kada tinan prioritiza iha postu administrativu balun atu fasilita movimentu populasaun sira-nian,” nia sujere.

Entretantu Deputadu CNRT, Patrocínio Ferndades, foti kestaun liga ba projetu eletrisidade iha suku ida iha Rotutu-Same nia prosesu konkursu la’o kle’ur tebes.

“Ha’u rona katak ministériu ka hosi EDTL loke konkursu mak dala tolu tiha ona laiha solusaun hela de’it, ne’e problema iha ne’ebé. Ne’ebé favór ida SEKOMS hato’o hela to’ok ba projetu eletrisidade ko’alia makas ona,” nia dehan,

Iha reuniaun plenária komisaun permanente ne’e, aleinde membru PN sira mós aprezenta preokupasaun kona-ba subsídiu liña frente ba membru Polísia Nasionál Timor-Leste (PNTL) no seguransa sivíl sira balun ne’ebé durante ne’e presta ona servisu iha ambitu COVID-19 maibé seidauk simu direitu renumeratóriu.

Hatán ba kestaun ne’e Governu, liu hosi Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, informa estrada ne’ebé liga Ermera ho Atsabe inklui Letefoho no parte lesta nian Lore-Lospalos daudaun ne’e iha ona prosesu loke konkursu públiku.

“Ha’u hakarak fó informasaun direta ba ida-ne’e, estrada ne’ebé liga Ermera ho Atsabe agora iha hela prosesu loke konkursu atu konsultan sira halo dezeñu no ida ba Lore ho Iliomar, Lospalos ne’e prosesu dezeñu la’o hela no bainhira ramata projetu sei hahú mós, inklui mós estrada iha fronteira hosi Batugade to’o Fatumean prosesu la’o ona,” nia informa.

Governante ne’e mós relata informasaun liña frente nian ne’ebé hetan hosi Ministériu Interiór (MI) katak hotu-hotu simu ona maibé hela fulan rua mak seidauk no daudaun prosesu ne’e iha hela Ministériu Finansa (MF) .

Kona-ba preokupasaun seluk SEKOMS rejista hela sei hato’o ba ministéiru relevante hodi bele responde.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!