iklan

EKONOMIA, HEADLINE

MF-DGE no RTTL, E.P asina akordu publisidade sensu uma-kain 2022

MF-DGE no RTTL, E.P asina akordu publisidade sensu uma-kain 2022

Prezidente Konsellu Administrasaun RTTL, E.P, José António Belo ‘Taraleu’ no Prezidente Komité Tékniku Nasionál sensu uma-kain tinan 2022 no atuál Diretór Jerál Estatístika, Élias dos Santos, asina akordu kona-ba publisidade sensu uma-kain tinan 2022, edifísiu sentrál RTTL, E.P, Caicoli, tersa (02/08). Imajen Tatoli/Egas Cristóvão

DILI, 02 agostu 2022 (TATOLI)—Ministériu Finansa liuhosi Diresaun Jerál Estatístika (DGE, sigla portugés) no Rádiu Televizaun Timor-Leste, Empreza Públika (RTTL, E.P), tersa ne’e, asina akordu públiku kona-ba publisidade sensu uma-kain tinan 2022.

“Ohin ita asina kontratu públiku ho RTTL, E.P ho objetivu halo publisidade ba sensu uma-kain 2022 tanba públisidade ne’e sei foku ba mensajen hosi Na’i-ulun sira, presiza mós múzika, no teatru kiik ruma hodi esplika ba públiku katak sensu atu hahú ona no ita-nia Na’i-ulun sira sei ko’alia polítika saida mak presiza implementa, enkuantu RTTL bele apoiu atividade Governu hodi públiku bele hatene,” Prezidente Komité Tékniku Nasionál sensu uma-kain tinan 2022 no atuál Diretór Jerál Estatístika, Élias dos Santos, hateten iha edifísiu RTTL, E.P, Caicoli.

Notísia relevante: Setembru 2021, Governu hahú atualiza sensus populasaun no uma-kain 2015

Tinan ne’e Governu organiza sensu populasaun uma-kain tinan 2022 ba da-IV tanba sensu ne’e hahú iha tinan 2004, 2010 no 2015.

Sensu ne’e sei hala’o iha loron 04 setembru to’o 05 outubru 2022, no lansamentu prelimináriu iha fulan-novembru.

“Daudaun ne’e prosesu rekrutamentu la’o hela iha munisípiu no sei foti mensajen hosi Prezidente Parlamentu Nasionál, Primeiru-Ministru, Prezidente Repúblika, Amu Bispu no seluk tan,” nia akresenta.

Prezidente Komité Tékniku kondidera sensu ne’ebé agora Governu hala’o ne’e importante tebes atu halo komparasaun dadus sensu tinan 2015 hodi haree mudansa no dezafiu sira oinsá bele halo monitorizasaun no komparasaun nune’e bainhira iha fallansu bele hadi’a ba planu dezenvolvimentu.

“Rekrutamentu ne’ebé ita halo ba pesoál iha postu administrativu, publisidade iha munisípiu, enkuantu sekretáriu tékniku iha munisípiu no nasionál. Ita rekruta 436, horiseik sira asina ona kontratu no aban hahú koloka ona ba kada munisípiu,” nia akresenta.

Ba etapa daruak nian, daudaun tama prosesu entrevista, ne’ebé presiza entrevistadór 2.345 no suspervizór 2.600 resin.

Iha fatin hanesan, Prezidente Konsellu Administrasaun RTTL, E.P, José António Belo ‘Taraleu’, hateten, asina akordu ne’e tanba instituisaun ne’e nu’udar empreza públika entaun kualker publikasaun sempre envolve.

“Ba publiksaun notísia hanesan mak laiha, maibé kona-ba ba programasaun ne’e ko’alia kona-ba empreza ninian, oinsá buka osan sustenta empreza ne’e rasik. Akordu ohin asina ne’e envolve kustu ruma no sei hetan reseita Estadu tuir padraun ne’ebé mak hatuur ona hosi lei dehan iha kustu emisaun, kustu ba iha ekipamentu, no produsaun, maibé RTTL, E.P hanesan empreza estatál entaun nia kustu iha depende ba programa ne’ebé iha, selu tuir volume ne’ebé iha,” nia dehan.

Maibé osan ne’ebé tama ba empreza estatál ne’e la’os ba direitamente atu uza maibé osan ne’e tama ba iha reseita Estadu.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!