MSSI reanúnsiu konkursu públiku sosa karreta funeráriu lima
DILI, 02 agostu 2022 (TATOLI)–Governu liuhosi Ministériu Solidariedade Sosiál no Inkluzaun (MSSI), re-anúnsiu konkursu sosa karreta funeráriu lima ne’ebé mak planu ba tinan ne’e nian.
Notísia Relevante: MSSI Prevee Rihun $200 Sosa Karreta Funeráriu Lima
“Ita la konsege sosa tanba laiha kompañia ida mak konkorre ba vaga kompra ne’e, entaun ita deside atu re-anúnsia vaga ne’e, nune’e sosa ona karreta funeráriu ne’e hodi reforsa karreta seluk,” Diretór Dirasaun Nasionál Asisténsia Sosiál (DNSA), Lucas Tois, hateten ba Agência Tatoli, iha nia kna’ar fatin Caicoli, Dili, tersa ne’e.
Vaga ne’e MSSI anúnsiu fulan rua liuba maibé laiha kompañia ida mak interrese hodi hatama nia dokumentu ba vaga refere.
“Ho ida-ne’e ha’u ezije nafatin atu aselera prosesu refere tanba kle\ur loos ona,” nia dehan.
Nia dehan, Governu planea atu sosa karreta funeráriu ne’e hamutuk lima ho nia osan hamutuk rihun $200-resin no kada karreta funer’ariu ho nia presu rihun $47.
Daudaun ne’e MSSI iha karreta funeráriu 40 resin, iha Dili karreta funeráriu 11 ba atendimentu públiku no kada munisípiu inklui Rejiaun Administrativu Espesiál Oé Cusse Ambeno (RAEOA) iha karreta rua (2) no mós Munisípiu Ataúro iha karreta funeráriu ida ho ró funeráriu ida-ne’ebé Governu sosa ona iha 2009 no 2013.
Jornalista : Osória Marques
Editór : Cancio Ximenes
