VIQUEQUE, 02 agostu 2022 (TATOLI)-–Progresu konstrusaun projetu komunitáriu Eskola Sekundáriu Tékniku Vokasionál (ESTV) Kaloheda, iha suku Matahoi, postu administrativu Uatulari, munisípiu Viqueque atinje ona 25%.
“Konstrusaun kompostu hosi eskritóriu ba profesór, sala laboratóriu, no sala enkontru profesór,” Prezidente grupu komunitáriu no atuál Diretór ESTV Kaloheda, Samuel da Costa da Silva, hateten ba Agência Tatoli iha ninia knaar fatin, tersa ne’e.
Notísia relevante: Eskola lima Viqueque seidauk implementa projetu komunitáriu tanba kondisaun estrada
Nia dehan, tuir lolos projetu konstrusaun eskola finaliza iha fulan-setembru, maibé tanba mudansa klímatika hanesan udan foin lalais, maka difikulta prosesu konstrusaun tanba dalan liga mai fatin konstrusaun ne’e bainhira tempu udan karreta labele mobiliza materiál, tanba ne’e projetu labele finaliza tuir data ne’ebé determina ona.
Maski konstrusaun la’o tarde, maibé grupu sira esforsu nafatin konstrusaun sala hitu sei finaliza iha dezembru tinan ne’e.
“Konstrusaun hotu la tuir tempu ne’ebé determina, maibé ami mós esforsu hela, fiar katak iha dezembru tinan ne’e sei finaliza konstrusaun no ami mós sei garante kualidade,” nia akresenta.
Aleinde ne’e, nia dehan, durante serbisu la’o, laiha problema mosu iha fatin konstrusaun tanba grupu komunitáriu no profesór sira kolabora ho di’ak.
Projetu komunitaláriu ne’e hahú iha loron 16 marsu no tuir planu finaliza iha loron 16 setembru 2022, maibé tanba mudansa klimátika, nune’e sei extende tan tempu konstrusaun.
Orsamentu ba konstrusaun sala hamutuk hitu mai hosi fundu transferénsia públika ho totál $156.590,65.
Jornalista : Vitorino Lopes da Costa
Editora : Julia Chatarina
