EDUKASAUN

‘CPA community screening’: “Ko’alia aat ema seluk ne’e ladi’ak”

‘CPA community screening’: “Ko’alia aat ema seluk ne’e ladi’ak”

DILI, 03 agostu 2022 (TATOLI) – Estudante komunikasaun sosiál, Fakuldade siénsia sosiál no polítika (FCS, sigla portugés), Universidade nacional Timor Lorosa’e (UNTL) hamutuk na’in 50 asiste sensibilizasaun vídeo “Cyber bullying’, aprezenta husi Casa produção audiovisual (CPA), iha ámbitu ‘CPA community screening’, iha kampus  FCS, Caicoli, Dili, ohin.

Objetivu husi aprezentasaun vídeo ne’e mak hafanu ema kona-ba oinsá impaktu negativu liliu psikolojikamente; mentalidade ema nian.

Estudante Helio Letos da Costa, iha marjen sensibilizasaun vídeo “Cyber bullying’, ne’e rekoñese katak liafuan ne’ebé la di’ak sei hamate ema nia vontade no karaktér.

“Ko’alia aat no insulta ema seluk katak aktu ne’e ladi’ak tanba sei implika psikolojikamente ba ema ninia mentalidade, tanba liafuan ne’e ninia implikasaun boot liu fali aktu violasaun fíziku ida ba ema ida,” estudante semetre VII ne’e afirma.

Nia mós agradese ba CPA tanba konsege prodús vídeo refere hodi hafanun komunidade, joven no foinsa’e atu hapara ko’alia lia aat, insulta ka defama ema seluk, no nia mós sujere atu kontinua espalla vídeo edukativu seluktan atu enkoraja vítima ba ‘bullying’ sira.

“Hanesan estudante ida iha área komunikasaun sosiál, ha’u husu atu nafatin kontinua halo vídeo edukativu sira hanesan ne’e no liuliu halo mós vídeo seluk ne’ebé fó apoiu mós ba maluk sira ne’ebé sai ona vítima ba bullying atu kontinua brani no iha motivasaun di’ak hodi hakat ba oin,” Estudante ne’e fó-hanoin.

Iha sorin seluk, Ivan Galucho Sarmento mós hatete katak programa ne’e importante tebes ba juventude ka foinsa’e sira tanba juventude barak mak seidauk hatene kona-ba impaktu bullying ninian.

“Ohin ami hetan ona bele mós fahe ba ami-nia maluk sira hodi ajuda mentalidade ami-nia maluk joven sira nian atu bele toman ka abitua ho moris ida ne’ebé dook husi defamasaun, insulta no lia aat sira seluk kontra ema seluk tantu direita no indireita”.

“Maske iha artigu 41 no 42 ko’alia kona-ba liberdade imprensa no liberdade espresaun. Espera ita-nia joven no komunidade hotu hetene uza liberdade ida ne’e ho edukativu no matenek” Ivan hakotu.

Iha ámbitu sensibilizasaun “Cyber Bullying” ne’e, Produtór vídeo CPA, Nelcen F. Escurial da Silva enkoraja atu ema ne’ebé sai ‘vítima’ ba bullying brani fó-sai, brani hasoru, ‘autór’ ne’ebé komete ‘bullying’ tanba, tuir nia, esperansa de’it la to’o.

“Iha vídeo ne’ebé ami fó sai ne’e liu-liu hakarak husu mós sujestaun husi imi hotu. Fó hanoin ne’e importante liu para ita bele hadi’ak liután problema kona-ba “cyber bullying.”

Notísia relevante:Prodús Lei “Cyber Security” Presiza Envolve Instituisaun Relevante

Jornalista: José Belarmino de Sá

Editór: Rafy Belo

iklan
iklan

Leave a Reply

iklan
error: Content is protected !!