HEADLINE, NASIONÁL, POLÍTIKA

Eliud de Jesus nomeadu nu’udar Prezidente Konsellu Administrasaun KMTL, SA

Eliud de Jesus nomeadu nu’udar Prezidente Konsellu Administrasaun KMTL, SA

Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (03/08). Imajen Tatoli/Francisco Sony

DILI, 03 agostu 2022 (TATOLI)–Ministru Petróleu no Minerál (MPM), Victor da Conceição Soares, aprezenta proposta deliberasaun, ne’ebé hetan aprovasaun iha Konsellu Ministru (KM), kuarta ne’e, kona-ba nomeasaun Eliud de Jesus Gomes, hanesan Prezidente Konsellu Administrasaun iha kompañia Mineira Timor-Leste, SA (KMTL, SA).

“Atu hili iha Asembleia Jerál, tuir proposta membru Governu ne’ebé responsável ba área rekursu umanu iha kompañia Mineira Timor-Leste, SA, tuir ho dekretu-lei númeru 43/2022, loron 08 juñu, ne’ebé kria ona kompañia Mineira Timor-Leste, SA,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.

Notísia relevante: ANPM sensibiliza lei kódigu mineiru hodi fó efeitu ba explorasaun

Iha biban hanesan, KM mós delibera hodi nomea Ministru Petróleu no Minerál, Victor da Conceição Soares, nu’udar reprezentante direitu Estadu, hanesan asionista iha kompañia Mineira Timor-Leste, SA.

“Projetu deliberasaun aprezenta ona hosi Ministru Petróleu no Minerál, ne’ebé deliberasaun ne’e haree ba saida maka define ona iha dekretu-lei númeru 43/2022, loron 08 juñu, ne’ebé kria ona KMTL, hodi determina katak direitu sira Estadu nian nu’udar asionista ezerse liuhosi ema ne’ebé hili hosi deliberasaun KM, tuir proposta hosi membru Governu responsável ba área rekursu umanu,” nia esplika.

Portavós Governu dehan, bainhira Governu sai hanesan asionista iha kompañia sira, reprezentante Governu tenki iha.

Jornaista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!