HEADLINE, KAPITÁL, NASIONÁL

IGE, I.P normaliza ona mota Welolo Viqueque

IGE, I.P normaliza ona mota Welolo Viqueque

Kondisaun mota Welolo Viqueque. Imajen/MOP

DILI, 03 agostu 2022 (TATOLI)—Ministériu Obra Públika (MOP) fó ona orientasaun ba Institutu Jestaun Ekipamentu, Institutu Públiku (IGE, I.P, sigla portugés) hodi normaliza mota Welolo iha suku Luka, postu administrativu Viqueque, munisípiu Viqueque.

“Ita-nia ekipa téknika hosi IGE daudaun ne’e iha terrenu halo hela normalizaun mota Welolo, hahú ohin bee halai tuir nia-dalan no transporte sira hahú movimentu normál tanba antes ne’e mota la halai tuir nia dalan,” Ministru Obra Públika, Abel Pires, hateten ba Agência Tatoli iha Palásiu Governu Dili, kuarta ne’e.

Notísia relevante: Juventude Luca husu IGE, I.P aselera normaliza Mota Welolo

Nia dehan, intervensaun provizóriu ne’ebé ekipa téknika halo mak protesaun ba mota uza jumbo simente no lori ai baku hosi oin no kotuk nune’e mota boot labele sobu.

“Provizóriu ita uza jumbo tonelada rua nian ne’e hamutuk 200 hodi proteje mota, orsamentu ne’ebé ita aloka hadi’a mota ne’e hamutuk $3.000 hosi sosa saku jumbo ne’e,” nia akresenta.

Intevensaun seluk, iha planu sei halo trava ba sedimentasaun tanba mota welolo ne’e rai-henek mak barak liu.

Antes ne’e, Ministru no ekipa téknika IGE halo observasaun direta ba kondisaun mota iha loron 17 juñu, ne’ebé nota katak sedimentasaun nakonu iha ponte okos, halo bee sulin tuir estrada kuaze metru 500 hodi fó impaktu ba movimentasaun ema no transporte labele liu iha área ne’e, maibé daudaun ne’e normaliza ona.

Durante halo observasaun, Ministru mós husu apoiu no ajuda hosi komunidade, liuliu tau-matan ba ekipamentu pezadu sira iha fatin ne’e, inklui husu matak-malirin nune’e bee kontinua tuir nia-dalan iha mota-laran labele estraga komunidade nia uma.

Iha parte seluk, komunidade afetadu hosi mota Welolo husu ba IGE, I.P atu kontinua halo normalizasaun nune’e tempu udan bee labele tama tan komunidade nia rezidénsia, kuandu bee sulin tuir estrada no tama komunidade nia rezidénsia halo komunidade labele book-an, la ba to’os ka ba merkadu, inklui estudante sira ba eskola defísil tebes.

Aleinde ne’e, defikulta inan-feton isin-rua sira ba klínika tanba bee-boot no  transporte labele liu, tanba ne’e komunidade agradese tebes ba intervensaun MOP no IGE, I.P.

Daudaun estrada iha Luka besik mota Welolo, ema no transporte bele halo ona movimentasaun tanba bee mota ne’ebé antes ne’e sulin tuir estrada daudaun ne’e sulin hikas ona iha nia fatin mota-laran.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!