COVALIMA, 03 agostu 2022 (TATOLI)–Ministériu Agrikultura no Peska (MAP) liuhosi Dirasaun Nasionál Extensaun Agrikola halo avaliasaun ba servisu anuál tinan fiskal 2022 ba extensionista suku-sira iha munisípiu Covalima.
“Ohin loron ne’e, Dirasaun Nasionál Extensaun Agrikola ho Departamentu Informasaun tama programa halo avaliasaun extensaun agrikola kada tinan ne’ebé hala’o mós iha munisípiu seluk hotu no agora ita tama ona iha Covalima,” Diretór Jerál Prestasaun Dezenvolvimentu Institutu, Cesario José da Cruz, hateten ba jornalista sira, iha Sanfuk, kuarta ne’e.
Enkontru avaliasaun ne’e atu hatene progresu extensaun agrikola ba extensionista sira-nia servisu ne’e la’o oiná tanba ohin extensionista sira mós hato’o sira-nia preokupasaun durante ne’e sira hasoru iha terrenu.
Durante hala’o enkontru avalisaun ne’e, extensionista sira hatao’o sira-nia preokupasaun hanesan laiha transporte no sira-nia orsamentu ba operasionál menus, tanba MAP prevee nafatin orsamentu atu bele ajuda extensionista hodi hato’o informasaun kona-ba extensaun agrikola liu-liu prátika agrikultura di’ak.
Aleinde haree kona-ba preokuapsaun ba extensionista sira, haree mós kona-ba extensionista balun asume ona kargu sira seluk no balun mate ona no mós presiza halo rekrutamentu.
“Avaliasaun ida-ne’e atu haree mós extensionista barak hetan ona kargu sira seluk no balun mate. Ho nune’e, ha’u sujere atu halo rekrutamentu hodi bele kobre suku sira no aumenta ho orsamentu atividade iha munisípiu,” nia dehan.
Preokupasaun hosi extensionista klaru tebes mak primeiru transporte hanesan motorizada prevee orsamentu maibé presiza diskute iha nivél munisípiu ho administradór hodi haree atividade extensaun agrikola, tanba nasionál kontinua prevee orsamentu hodi fó apoiu orsamentu bainhira bele ona la’o mesak no bele husik ona sira.
“Ha’u esplika kona-ba saida mak despaixu ministeriu konjunta (DMK) no mós Kontratu administrativu inorgániku (KAI), buat ne’ebé seidauk bele delega seidauk bele delega, la signifika labele halo buat hotu. Maibé, sempre iha koordenasaun komunikasaun atu implementa dekretu-lei ho loloos,” nia dehan.
Bazea ba Dekretu-Lei númeru 3/2016 dominiu seguransa alimentar ne’ebé mak haruka mai munisípiu no mós dominiu agrikultura sei kobre sub-setór hotu, tanba haree ba rekursu umanu iha munisípiu kiik.
“Orsamentu ne’ebé téknikamente ita labele tau terseira ita haree fonte orsamentu mai iha munisípiu bele hamriik mesak ne’ebe la ajuda hosi nasionál, maibé agora labele desizaun sentraliza iha nivél nasionál,” nia esplika.
Tanba, tuir nia, ministériu prevee orsamentu iha área pekuaria, peska, agrikola no floresta sira-nia atividade sira-ne’e, liga mai extensaun no informasaun saida mak hala’o hosi kada dirssaun jerál sei kobre.
Diretor Servisu Agrikultura Munisípiu Covalima, Domingos Gusmão, hateten atividade ohin ne’e halo’a enkontru avaliasaun servisu ba extensionistu sira iha munisípiu Covalima tanba ne’e extensionista sira presiza halo reflesaun.
“Ohin-ne’e hala’o enkontru avaliasaun, husu ba extensionista ida-idak halo reflesaun ba ida-idak nia an iha funsionamentu extensaun agrikola iha munisípiu Covalima. Saida mak ha’u atinje ona durante tinan ida no balun seidauk atinje no buat ne’ebé mak di’ak ona mantein,” nia dehan.
Durante ne’e extensionista suku sira hala’o servisu iha terrenu hodi hasoru dezafiu sira maibé konsege buka meiu hodi bele hakat liu ho sira-nia maneira rasik.
Dezafiu ne’ebé mak extensionista suku sira hasoru mak hanesan laiha transporte hanesan motorizada sira-ne’ebé mak tama ona lelaun tanba motorizada uza ona iha tempu naruk ho kondisaun ne’ebé mak grave, nune’e sira laiha ona direitu atu hetan kupon ba kombstível no mós extensionista sira hela iha ida-idak nia rezidénsia hodi difikulta sira-nia servisu.
Razaun extensionista hela ida-idak nia rezidensia difikulta ba sira-nia servista tanba hanesan extensionista balun nia rezidénsia iha Salele maibé hala’o servisu destaka iha postu administrativu Zumalai entaun presiza transporte.
Maske laiha motorizada maibé sira rasik esforsu hodi buka meiu transporte ne’ebé iha, sira kontinua hala’o sira-nia atividade diária.
Jornalista : Celestina Teles
Editór : Cancio Ximenes
