DILI, 03 agostu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu dekretu-lei, ne’ebé aprezenta hosi Ministru Defeza (MD), Filomeno da Paixão de Jesus, kona-ba rejimentu foun konsellu superiór defeza militár nian.
“Diploma ida-ne’e ninia objetivu mak atu permite rejimentu konsellu superiór defesa militár bele kompatibiliza ho Lei Defeza Nasionál ne’ebé vigora hela, ho nune’e revoga dekretu Governu númeru 6/2016, loron 11 maiu,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu.
Notísia relevante: PN aprova proposta alterasaun ba lei defeza nasionál iha finál globál
Portavós Governu dehan, alterasaun ida-ne’e hanesan define ona iha Lei Defeza Nasionál, ba oin, Jenerál sira ne’ebé laiha efetividade serbisu, ne’ebé ezerse ona kargu Xefe Estadu Maiór- Jenerál Forsa Armada, Vise-Xefe Estadu Maiór Jenerál Forsa Armada ka Xefe Estadu Maiór Forsa Armada, sei integra ba Konsellu Superiór Defeza Militár.
“Ho objetivu atu garante tranzisaun no implementasaun ba objetivu dezenvolvimentu nian sira ne’ebé define ona iha dokumentu estratéjiku defeza nian. Ba oin, obrigatóriu mós atu halo somumutuk konsellu ne’e nian kona-ba alterasaun estrutura orgánika FALINTIL-Forsa Defeza Timor-Leste (F-FDTL) nian, no kona-ba proposta sira nomeasaun no ezonerasaun nian ba kargu Xefe Estadu Maiór Jenerál Forsa Armada, Vise-Xefe Estadu Maiór Jenerál Forsa Armada no Xefe Estadu Maiór Forsa Armada, no mós ba dispozitivu F-FDTL,” nia akresenta.
Antes ne’e, iha loron 24 maiu 2021, Parlamentu Nasionál aprova ona proposta alterasaun Lei Defeza Nasionál iha finál globál, ne’ebé iha proposta-alterasaun ne’e la hatama asuntu foun kona-ba komandante komponente sira, maibé aumenta de’it mak Vise-Xefe Estadu Maiór, ne’ebé komandante komponente sira agora ne’e korresponde ba Xefe Estadu Maiór hosi ramu sira. Iha lei ida-ne’e iha komandante komponente iha na’in-tolu mak hanesan terrestre, navál no aéreu.
Aleinde ne’e, razaun Governu propoin alterasaun atu kondiz ho situasaun reál forsa armada nian no razaun seluk husu alterasaun tanba dezde tinan 2010 la atualiza.
Iha alterasaun ne’e, atu uniformiza mós komponente tolu iha forsa armada komposta hosi navál, terrestre no komponente ida sei mosu iha futuru mak aéreu.
Jornalista : Antónia Gusmão
Editora : Julia Chatarina
