DILI, 04 agostu 2022 (TATOLI)–Ministériu Edukasaun Juventude no Desportu (MEJD) tinan ne’e sei fó bolsa estudu mellór graduadu ba estudante hamutuk 13.517 hosi ensinu báziku, ensinu sekundáriu jerál no tékniku vokasionál iha territóriu nasionál.
“Orsamentu ba programa bolsa estudu mellór graduadu prevee iha Orsamentu Retifikativu 2022. Bolsa ne’e ita fó ba eskola públiku no privadu sira hotu iha direitu atu asesu,” Diretór Jerál Edukasaun Ensinu MEJD, Luís Manuel Fernandes, hateten iha serimónia lansamentu programa hitu iha Eskola Ensinu Báziku Sentrál (EBC, sigla portugés), 30 agostu Comoro, kinta ne’e.
Orsamentu ne’ebé atu apoiu programa bolsa estudu mellór graduadu ba estudante sira prevee ho montante millaun $7,5 resin.
Notísia relevante: Tinan 11 eziste, FDCH gasta millaun $300 ba bolsa estudu 7.000
Objetivu programa ne’e atu intensiva, estimula no motiva estudante sira atu haka’as-an hasa’e aproveitamentu eskolár, nune’e bele domina siénsia no teknolojia.
MEJD implementa programa ne’e ba nível nasionál no munisipál haree hosi rezultadu ezame nasionál.
Nune’e mós, ba estudante nível ensinu báziku primeiru no segundu siklu no ensinu sekundáriu jerál no tékniku vokasionál hosi désimu primeiru anu nian haree hosi rezultadu pasajen klase hosi tinan 2022.
“Ita hein rezultadu ezame pasajen klase no ezame nasionál tinan ne’e ramata eskola maka aprezenta kandidatu ka sira ne’ebé merese duni atu hetan bolsa ida-ne’e ba Ministériu Edukasaun Juventude no Desportu, nune’e munisípiu ida-idak mak halo kontaktu ho Banku Nasionál Komérsiu Timor-Leste (BNCTL, sigla portugés) hodi halo transferénsia osan ba konta bankária estudante ida-idak ninia,” nia tenik.
Jornalista : Tomé Amado
Editora : Julia Chatarina
