HEADLINE, INTERNASIONÁL, MUNISÍPIU, OÉ-CUSSE (RAEOA)

Família presta omenajen ba militár Koreanu na’in-lima ne’ebé lakon vida iha RAEOA

Família presta omenajen ba militár Koreanu na’in-lima ne’ebé lakon vida iha RAEOA

OÉ-CUSSE, 04 agostu  2022 (TATOLI) – Família enlutada hosi Korea, lidera hosi embaixadór Korea ba Timor-Leste, Kim Jeongho, akompanã hosi komandante batallaun ba matebian forsa Koreanu na’in-lima, Kim Yeong Deok, kinta ne’e presta omenajen ba forsa Koreanu na’in-lima iha monumentu jerdín Oébau, Rejiaun Administrativa Espesiál Oé-Cusse Ambeno (RAEOA).

Saudozu militár Koreanu na’in-lima ne’e lakon sira-nia vida iha mota Noel-Ekat, suku Bobometo, sub-rejiaun Oésilo iha 06 marsu 2003, bainhira hala’o misaun pás Organizasaun Nasaun Unida (ONU) liuhosi Peace Keeping Force (KFP) iha Timor-Leste.

Kauza hosi hosi asidente ne’e tanba hetan dezastre naturál, udan-boot mota tún, nune’e forsa na’in-lima ne’e ho laran kmaan atu ultrapasa mota refere, maibé la konsege nune’e hetan asidente hodi rezulta forsa na’in-lima komposta hosi Letnan Colonel na’in-rua no Sarjentu na’in-tolu lakon vida iha mumentu ne’e.

Saudozu na’in-lima ne’e maka hanesan, Letnan Koonel Byungjo Min, Letnan Kolonel Jin Kyu Park, Sarjentu Jong Hoon Baek, Sarjentu Jeong Joong Kim no Sarjentu Hee Choi.

Hafoin remata presta omenajén, Espoza hosi matebian, Letnan Kolonel Byungjo Min, Kim Ayeyoung, sente kontente tanba iha oportunidade bele mai to’o Timor-Leste, liuliu Oé-Cusse hodi presta omenajen hafoin tinan 19.

“Ha’u kontenti tebes depois tinan 19 bele mai direta  hasoru komunidade Oé-Cusse, tanba iha 2003 ami lakon ami-nia la’en, maun-alin no aman, sira lakon ona iha fatin ne’e, ami hanesan família la haluha loron akontesimentu ne’e, ami sente triste maibé agradese bele fila mai haree direta fatin hodi presta omenajén,” Kim Ayeyoung hateten.

Espoza saudozu Letnan Kolonel Byungjo Min nee dehan,  sira na’in-lima mate parte família hatene katak sira la’ós mate saugate maibé sira na’in-lima halo duni mumentu signifikante ida, ne’ebé maka kesi metin rai rua nia relasaun to’o ohin loron.

Nune’e mós la’ós signifika mumentu fulan neen sira mai servisu iha Timor-Leste, maibé ho domin hakarak asegura rai ne’e atu sai hosi intimidasaun no susar oinoin,  sira na’in-lima ne’e, ema ne’ebé maka fó laran tebes hadomi duni Oé-Cusse, tán ne’e maka sira mai iha mumentu espesiál tebes.

“Depois tinan 19, ami fila mai haree Oé-Cusse iha mudansa ba dezenvolvimentu, ida-ne’e parte ida hosi sira-nia dedikasaun sakrifísiu sira halo ona, ami fiar katak hanesan Nai Jesus Kristu mate iha kruz, hodi isin atu salva sarani sira, ami fiar sira na’in-lima mate ba rai ida-ne’e atu asegura pás no estabilidade iha Timor-Leste  liuliu Oé-Cusse,” nia afirma.

Nune’e nia  reprezenta família enlutada agradese ba Governu Korea no Timor-Leste bele fasilita família enlutada na’in-lima hodi mai presta omenajén sunu lilin no kari ai-funan ba família sira nia rate ka monumentu lulik ne’e.

Embaxadór Korea ba Timor-Leste, Kim Jeongho, agradese ba autoridade RAEOA tanba serbisu hamutuk hodi kuidadu mumentu ne’e sai fatin istóriku ba jerasaun tuir mai.

“Ha’u reprezenta Estadu Korea agradese ba autoridade RAEOA, ne’ebé trata monumentu ne’e hanesan monumentu família nian, sempre kuidadu fatin ne’e nomoos simu família matebian sira ho di’ak, atu mai sunu lilin no kari ai-funan, ha’u fiar ho asaun ne’e bele kesi metin relasaun iha entre Korea ho Oé-Cusse iha futuru,” Kim Jeongho, ko’alia hafoin remata presta omenajén iha jardín Koreanu Oébau Oé-Cusse.

Diplomata ne’e orgullu tanba iha serimónia presta omenajen ne’e, hetan partisipasaun másimu hosi veteranu sira iha Oé-Cusse, komunidade no parte seguránsa sira, hodi hatudu sira-nia domin ba matebian sira, ne’ebé lakon sira-nia vida iha rejiaun ne’e tanba hala’o misaun pás ONU nian iha Timor-Leste.

Prezidente Autoridade RAEOA, Arsénio Paixão Bano, konsidera monumentu ne’e sai hanesan memoria no istória ba jerasaun ba povu Timor-Leste no Korea.

“Ha’u lori povu Oé-Cusse no Timor-Leste nia naran agradese no hakru’uk ba família matebian sira, tanba tinan 19 ohin ne’e mai to’o Oé-Cusse, atu hasoru direta matebian sira-nia rate, liuliu sarjentu ida seidauk hetan to’o ohin loron, ita espera husu lulik no matebian atu tulun ita hodi hetan nia mate isin,” nia orgullu.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!