EDUKASAUN, HEADLINE, MUNISÍPIU, OÉ-CUSSE (RAEOA)

Edifísiu KOICA iha RAEOA inauguradu

Edifísiu KOICA iha RAEOA inauguradu

Autoridade RAEOA no Embaixada Korea iha Timor-Leste, inaugura edidísiu KOICA RAEOA hodi hasa'e kapasitasaun rekursu umanu. Imajen mídia ZEESM.

OÉ-CUSSE, 04 agostu  2022 (TATOLI) – Governu Korea liuhosi Embaixadór Korea ba Timor-Leste, Kim Jeongho, akompaña ho Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, kinta ne’e inaugura edifísiu Korea International Cooperation Agency (KOICA) hodi fasilita formasaun edukasaun naun-formál ba kapasitasaun rekursu umanu iha rejiaun ne’e.

Embaixadór Korea ba Timor-Leste, Kim Jeongho, agradese ba KOICA tanba harii fasilidade ne’e kualidade, nia espera bele utiliza fatin ne’e sai sentru formasaun ba rekursu umanu no sai mós fatin dezenvolvimentu iha rejiaun ne’e.

“Razaun ita halo sentru ne’e, tanba uluk fatin ne’e KOICA uza hodi hala’o atividade sosiál iha Oé-Cusse, tan ne’e importante no signikante tebes ita halo inaugurasaun ohin, tanba iha marka prezensa hosi família matebian forsa Koreanu na’in-lima iha Oé-Cusse, tanba fatin ida-ne’e instala ona komputadór atu fasilita formasaun ba joven sira, atu kapasita rekursu umanu iha Oé-Cusse nia oan sira,” Kim Jeongho, ko’alia iha serimónia inaugurasaun ne’e.

Diplomata ne’e informa, iha futuru Governu Korea sei komunika ho autoridade RAEOA atu harii tán fasilidade ba formasaun seluk, hanesan biblioteka ba sentru aprendizajen língua nian nune’e fatin rua bele fasilita joven sira atu buka matenek.

Embaixadór Korea ba Timor-Leste, Kim Jeongho orgullu tanba durante tinan barak KOICA destaka ona voluntáriu sira iha Oé-Cusse atu hala’o atividade sosiál, hanesan embaixadór iha Timor-Leste desezu tanba munisípiu 13  iha Timor-Leste, maibé munisípiu espesiál maka Oé-Cusse.

Diplomata ne’e promete sei komunika ho dirijente KOICA, atu serbisu hamutuk ho autoridade RAEOA, atu fasilita apoiu ba setór dezenvolvimentu rekursu umanu.

Tan ne’e iha oportunidade ne’e nia husu iha futuru karik autoridade persiza tulun ruma, bele komunika ho KOICA, hodi tau interese espesiál ba iha autoridade RAEOA kona-bá programa soiál ka konstrusaun ruma.

“Ha’u hanesan embaixadór sempre hadomi Oé-Cusse, ha’u dezeju tebes Governu Korea iha atensaun espesiál atu dezenvolve rejiaun Oé-Cusse, tanba atensaun espesiál sira-ne’e, hatudu ona iha tinan kotuk liuba, programa distribuisaun ai-han balu ba povo Oé-Cusse,” nia afirma.

Nune’e nia enkoraja autoridade RAEOA ne’ebé lidera hosi, Arsénio Paixão Bano, atu muda Oé-Cusse sai  rikuliu, moderna no dezenvolve liu atu nune’e bele nafatin fó signika no fó omenajén ba forsa Koreanu na’in-lima ne’e lakon sira nia vida iha 2003, nune’e sira- bele kontenti iha mundu seluk.

Prezidente Autoridade RAEOA, Arsénio Paixão Bano, orgullu tanba sentru ne’e, importatnte bele hametin relasaun entre povu Oé-Cusse ho povo Korea.

“Obra sira-ne’e hatudu katak, relasaun Korea ho Timor-Leste espesiál ba Oé-Cusse maka’as tebes, fatin ne’e sei sai formasaun no fatin ba Korea nian iha Oé-Cusse, ha’u hanesan Prezidente Autoridade promete ona iha antes, atu aumenta fatin ne’e sai luan tán hodi kompleta ida ne’e servi ba públiku, liuliu atu kapasita foinsa’e sira atu buka matenek iha setór oinoin,” nia orgullu.

Nia konsidera obra ne’ebé Governu Korea konstrui iha Oé-Cusse, sai hanesan lembransa ba povu Oé-Cusse.

Konstrusaun ne’e ezekuta hosi empreza East Sunrise Timor Constructions, ho valór Orsamentu hamutuk $50,000.00, kompleta ho mobiliáriu kadeira, meja no komputadór.

Jornalista   : Abílio Elo Nini

Editór         : Evaristo Soares Martins

iklan
iklan

Leave a Reply

iklan
error: Content is protected !!