BOBONARO, DESPORTU, HEADLINE, MUNISÍPIU, SOSIEDADE SIVĺL

IKS-KORK prontu fó seguransa ba serimónia graduasaun PSHT iha Bobonaro

IKS-KORK prontu fó seguransa ba serimónia graduasaun PSHT iha Bobonaro

Membru foun PSHT munisípiu Bobonaro ne'ebe preparadu atu partisipa serimónia graduasaun iha tinan 2022. Imagen Tatoli/Sérgio da Cruz.

BOBONARO,04 Agostu 2022 (TATOLI)-Organizasaun arte-marisiál Ikatan Kera Sakti (IKS) no Kmenek Oan Rai Klaran (KORK) prontu apoia seguransa ba serimónia graduasaun  membru foun Persaudaraan Setia Hati Terrate (PSHT) iha munisípiu Bobonaro, ne’ebé tuir planu sei realiza iha loron 22 fulan ne’e.

Koordenadór IKS munisípiu Bobonaro, Alarico Tavares, informa, hafoin governu reativa hikas atividade arte- marsiál IKS sempre kria liña koordenasaun di’ak ho organizasaun hotu-hotu inklui PSHT hodi kontribui ba pás no estabilidade iha munisípiu Bobonaro.

Ezemplu konkreta ida mak foin lalais organizasaun PSHT realiza pra-tes ba membru foun sira iha munisípiu Bobonaro, la’o ho susesu iha ambiente hakmatek.

Notísia relevante: Kandidatu PSHT munisípiu haat sei gradua iha Jináziu Maliana

“Ami mós sei prepara ami-nia membru ida, hatais farda sa’e kareta hamutuk ho membru PSHT foun hosi postu mai, atu garante seguransa, bainhira atu halo preblema karik, nia haree ba nia identidide tanba ha’u-nia ema ida iha laran hela, entaun nia la halo problema ona,” nia informa ba Jornalista sira iha salaun administrasaun Bobonaro, kinta ne’e.

Alarico sei pasa informasaun terinadór iha fatin hotu-hotu ne’ebé establese iha munisípiu Bobonaro, atu orienta membru sira kontribui garante seguransa másimu ba deslokasaun membru PSHT sira hosi postu bs kapitál Maliana.

“Ita haree hosi pasu pozitivu katak, hosi arte ida-ne’e atu kontribui ba pás no establidade la’o di’ak, ita hatene katak iha pasadu ema hotu ko’alia katak, arte marsiál mak ladi’ak iha sosiedade, maibé ho permeiru ba PSHT nia halo atividade graduasaun, hanesan pasu pozitivu ba futuru atu ema hotu labele konta beibeik,” nia dehan.

Ajuntu Sekretáriu Jerál (KORK), Agostinho dos Santos Mouzinho, promete apoia másimu seguransa, maibé husu ba lideransa PSHT sira presiza aprezenta lista totál membru hirak mak desloka hosi postu atu mai tuir graduasaun iha Maliana.

Nia akresenta KORK presiza duni hetan lista fiksu tanba bazea dadus ne’ebé aprezenta hosi Konselleiru PSHT Bobonaro, katak membru foun ne‘ebé prepara atau gradua iha tinan ne’e ho kuantidade ne’ebé boot.

“Sira mai iha área ne’ebé kahur, hosi Bobonaro nian kahur IKS no KORK, entaun oinsá ita bele mantein seguransa atu nune’e ami bele pasa informasaun direita ba membru sira iha postu to’o suku, nune’e momentu graudasaun to’o 23 agostu, sira fila seiguransa la’o di’ak nafatin,” nia fó hanoin.

“Ami iha obrigasaun atu mantein seguransa, hahú hosi postu idak-idak to’o suku, mai to’o munisípiu durante loron 21 to’o 23 ne’e serimónia bele la’o ho susesu iha pás no establidade nia laran,” nia promete.

Konselleiru PSHT Munisípiu Bobonaro, Arlindo de Oliveirra, orgulu rona novidade ne’e no konsidera asaun sira- ne’e motiva ema idak-idak atu sai sidadaun ne’ebé di’ak.

“Ita hanoin di’ak no loos, hanesan juventude atu kolabora hamutuk hodi haree ba eventu ne’ebé sei realiza iha fulan agostu nia laran hosi organizasaun PSHT,” nia subliña.

Arlindo hatutan, liuhosi apoia hirak- ne’e bele hametin liután sentidu amizade entre grupu arte-marasiál sira hotu, tanba ne’e ba futuru  PSHT mós nafatin fó apoia ba organizasaun sira seluk ne’ebé realiza sira-nia kualkér atividade.

Komandante PNTL munisípiu Bobonaro, Superintendente Polísia Antóninho Mauluta, orienta ona membru sira atu halo seguransa másimu ba eventu ne’e, maibé presiza mós kontribuisaun hosi grupu arte-marsiál sira seluk.

“Ami preparadu ona atu fó seguransa, maibe ita-boot sira, liuliu KORK, IKS no seluk ita tenke apiou malu halo seguransa, hodi ita hatudu ba ema hotu katak ita munisípiu mós bele,” Komandante PNTL Bobonaro ne’e apela.

Tuir dadus fiksu membru foun PSHT munisípiu Bobonaro ne’ebé preparadu atu gradua iha tinan ne’e hamutuk ema na’in-974, mai hosi postu administrativu Atabae, Balibo, Cailaco, Maliana, Bobonaro no postu Lolotoe.

Enkuantu tuir oráriu iha loron 11 fulan ne’e sei halo uluk teste ba manu ka ‘tes jago’ ne’ebé sei realiza iha Ranting lima mak hanesan, Nunura iha suku Tapo-Memu, ospitál-Tuan iha suku Holsa, Koni Rai-Maten, suku Odomau, Sene iha suku Holsa, Obor iha suku Raifun, postu administrativu Maliana.

Ikus liu, serimónia rituál ba graduasaun nian sei realiza iha fatin rua mak hanesan ida iha Jináziu Maliana no ida seluk iha armazein kompañia Sorte ne’ebé lokalíza iha Soso, Maliana.

iha parte seluk, Konselleiru Persaudaraan Setia Hati Terrate (PSHT) munisiípiu Bobonaro, Arlindo de Oliveira, husu ba VIII Governu Konstituisionál atu buka meiu hodi importa produtu ‘pisang raja ka hudi uma-andár hosi nasaun viziñu, Repúblika Indonézia mai Timor-Leste hodi prepara ba serimonia rituál graduasaun membru foun ne’ebé sei realiza iha loron 22 fulan ne’e.

Nia fundamenta, hudi ne’e sai hanesan produtu ka materiál importante ne’ebé  bainbain sempre utiliza iha serimónia rituál graduasaun ba membru foun hamutuk ho malus no manu ka ema bolu ‘ayam jago’ ,maibé durante observa katak hudi ne’e buka defisil tebes tanba maioria komunidade iha territóriu la kuda.

Arlindo observa katak, hudi uma-andár iha komunidade munisípiu Líquisa kuda hela, maibé ho kuantidade ne’ebe kiik labele atende ba munisípiu hotu-hotu tanba membru foun ne’ebe prepara atu gradua iha tinan ne’e ho númuru ne’ebé boot.

“Hudi ne’e faan iha Arámbua barak, ami buka agora mós araska loos, ne’ebé sé bele mós KRAM ko’alia took ho governu atu ita hatama de’it hosi Indonézia,” nia hateten.

Prezidente Sub-Komisaun Reguladora Arté-Marsiál (KRAM) munisípiu Bobonaro, José Ramos, hateten KRAM laiha kompenténsia atu foti desizaun ruma tamba ne’e sei aprezenta ba nível altu deside tuir lei.

Notísia relevante: Kandidatu membru PSHT 1.057 hosi Bobonaro sei gradua iha tinan ne’e

Jornalista: Sérgio da Cruz

Editor: Evaristo Soares Martins

iklan
iklan

Leave a Reply

iklan
error: Content is protected !!