DILI, 04 agostu 2022 (TATOLI)—Konsellu Administrasaun Fundu Infraestrutura (KAFI) ne’ebé lidera hosi Prezidente KAFI no atuál Vise Primeiru-Ministru no Ministru Planu, José Reis, halo reuniaun extraordinária no aprova tan projetu importante tolu hosi Ministériu Obra Públika (MOP).
“Horiseik KAFI aprova tan projetu importante tolu hanesan projetu estrada urbana no munisipál iha Maliana, munisípiu Bobonaro hamutuk kilómetru 25, projetu reabilitasaun estrada hosi Manleuana to’o Kasnafar kilómetru ida resin ne’ebé hetan estragu iha kalamidade iha loron 04 abril 2021 no projetu konstrusaun estrada foun Dili-Aileu hosi Fatisi iha área bee tudak to’o Sarlala kilómetru ualu estrada ne’e sei tau aspal,” Ministru Obras Públika, Abel Pires, hateten, iha Ministériu Finansa (MF), Aitarak-laran, kinta ne’e.
Notísia relevante: Autoridade munisipál koordena MOP prioritiza estrada Maliana-Bobonaro no Lolotoe
Projetu importante tolu ne’ebé KAFI aprova ne’e aprezenta hosi Diretora Ezekutiva Sekretariadu Grande Projetu (SGP), Odete da Costa Vitor, akompaña hosi Diretór Jerál Obra Públika, Rui Hernani, hanesan projetu na’in iha reuniaun KAFI.
Orsamentu ba projetu ne’e ba estrada boot urbana no munisipál ho distánsia kilómetru 25 iha munisípiu Maliana, ne’ebé pakote ida millaun $16 no pakote seluk millaun $20 resin.
Projetu reabilitasaun estrada hosi Manleuanna to’o Kasnafar kuaze kilómetru ida resin ho totál millaun $5,5.
Projetu konstrusaun estrada foun Dili-Aileu hosi Fatisi iha área bee tudak to’o Sarlala kilómetru ualu, estrada ne’e sei tau aspal, no orsamentu la to’o millaun $5, orsamentu sira ne’e deside tama hotu fundu infraestrutura.
“Agora iha hotu ona prosesu aprovizionamentu hein fulan ida ka rua tan bele ramata ita hahú ona maibé importante mak molok udan projetu sira ne’e hala’o ona no Maliana mak sei kleur oituan tanba estrada urbana orsamentu boot,” nia akresenta.
Tuir Ministru, estrada mota Comoro ninin hosi Manleuana to’o Kasnafar ne’ebé hetan estragu hosi kalamidade ne’e importante tebes atu halo manutensaun tanba estrada ne’e iha kapitál no fasilita movimentasaun ema no transporte públiku no privadu hosi munisípiu mai kapitál no hosi kapitál ba munisípiu, nune’e mós estrada iha Maliana.
Aleinde ne’e, Ministru Obraa Públikaa defende katak projetu hirak ne’e presiza tebes hetan aprovasaun hosi KAFI hodi implementa iha tinan ida-ne’e tanba nia orsamentu tama ona iha Orsamentu Jerál Estadu (OJE) 2022 nian.
Hafoin aprezentasaun, KAFI rekomenda atu MOP liuhosi Diretór Jerál Obra Públika kontinua halo ezersísiu barak liután ho Ajénsia Dezenvolvimentu Nasionál (ADN) ba implementasaun projetu sira.
Aleinde aprova projetu hosi MOP, KAFI mós aprova projetu Dezeñu Enjenária Detalladu ba konstrusaun edifísiu foun Provedoria Direitu Umanu no Justisa (PDHJ, sigla portugés) no proposta ba projetu konstrurusaun edifísiu Unidade FALINTIL-Forsa Defeza Timor-Leste (F-FDTL) ka Forsa Espesiál.
Projetu ne’e nia orsamentu montante millaun $5 resin sei lori ba Konsellu Ministru atu hetan autorizasaun, hafoin mak Komisaun Nasionál Aprovizionamentu (CNA, sígla portugés) loke konkursu no projetu ne’ebé nia orsamentu hosi millaun $5 sei ba direita loke konkursu ba projetu sira.
Reuniaun KAFI ne’e partisipa hosi Ministru Finansa, Rui Augusto Gomes, Ministru Transporte no Komunikasaun, José Agostinho da Silva, Diretór ADN, Mariano Reinato da Cruz, Diretór CNA, Hermingardo da Costa Soares, inklui tékniku sira.
Jornalista : Arminda Fonseca
Editora : Julia Chatarina
