OÉ-CUSSE, 04 agostu 2022 (TATOLI) – Ministériu Administrasaun Estatál (MAE), nomea Tomás Américo Boquifai nu’udar Diretór Programa Nasionál Dezenvolvimentu Suku (PNDS) iha Rejiaun Administrativa Espesiál Oé-Cusse Ambeno (RAEOA) hodi troka diretór sesante, Sebastião Tanesi.
Nomeasaun ne’e bazea despaixu hosi MAE ho nú. Ref; 011/DGDR-MAE/III/2022, nomeasaun no substituisaun kargu xefia DD-PNDS. Ne’ebé ezonera, Diretór PNDS RAEOA, Sebastião Tanesi, hodi nomea Tomás Américo Boquifai nu’udar diretór foun.
Konsiderasaun kompeténsia ho nia atribuisaun artigu 33-A, juñu artigu 33-B/33-C, hosi dekretu-lei nú.53/2020, 28 outubru, oráanika Minitériu Administrasaun Estatal, konsidera atu asegura serbisu mákina Programa Nasionál Dezenvolvimentu Suku (PNDS), ho nia funsionamentu normál, bazea dezenpeñu no armonizasaun serbisu, konsidera planu re-jerasionál liuhosi kuadru no ajente sira iha programa PNDS, hodi hodi prepara ba futuru jestór.
Iha kompromisu simu kna’ar foun ne’e, Diretór PNDS RAEOA, Tomás Américo Boquifai, promete sei hala’o kna’ar bazea prinsípiu mata dalan Ministériu Administrasaun Estatál nian ba Programa Nasionál Desenvolvimentu Suku iha iha rejiaun ne’e.
“Ha’u Agradese ba konfiansa no responsabilidade ne’ebé entrega mai ha’u, ha’u sei la’o tuir prinsípiu no mata dalan ne’ebé regula iha lei nú.8/ 2013, previzaun primeiru nú.30/2015 no previzaun ikus mak nú.18/21, primeiru atu redús pobreza komunidade maka deside prioridade partisipasaun feto no mane iha diretu no transparénsia ba akuntabilidade,” Tomás Américo Boquifai ko’alia iha Oé-Cusse, kinta ne’e.
Nune’e ba konfiansa ne’ebé nia simu, nia parte sei serbisu hamutuk ho autoridade komunitáriu sira ho jestór sub-rejiaun no Autoridade RAEOA hodi aselera servisu ba implementasaun Programa Nasionál Dezenvolvimentu suku ne’ebé benefísia direta ba povu Oé-Cusse.
Jestór sub-rejiaun Pante Makasar, Eurico da Costa Bobo, espera ho prezensa lideransa foun persiza mellora di’akliu tán serbisu infraestrutura nian atu besikliu ba komunidade.
“Ita espera iha futuru mellora di’akliu tán serbisu ne’ebé diretór sesante rai hela, presiza serbisu hamutuk ho ekipa nune’e bele lori dezenvolvimentu besik liután ba komunidade, tanba prioridade PNDS ne’e maka lori infraestrutura bázika iha área remota, hanesan bee-moos, estrada, ponte no seluk tán,” nia fó hanoin.
Diretór sesante PNDS RAEOA, Sebastião Tanesi, informa, nia parte asumi kna’ar ne’e dezde 2013 to’o jullu 2022, tanba ne’e kleur ona iha Funsaun Públika, bazea lei Funsaun Públika sita katak, asume kargu xefia ne’e la presiza tinan barak, entaun nia parte agradese no promete sei kolabora atu hodi serbisu hamutuk atu hatudu rezultadu di’ak ba programa PNDS bele sai di’ak no kualidade iha rejiaun ne’e.
“Ohin, ha’u entrega ha’u-nia kna’ar hanesan diretór ba diretór foun, atu kontinua serbisu ba programa PNDS nian iha povu Oé-Cusse nia leet, ha’u apresia tebes ba funsionáriu PNDS iha RAEOA, tanba durante ha’u lidera buat barak ita halo ona no barak ita seidauk halo, maibé ita sei serbisu hamutuk ba programa nasionál ne’e, hodi implementa ho di’ak iha ita-nia rejiaun ne’e,” nia agradese.
Jornalista: Abílio Elo Nini
Editór: Evaristo Soares Martins
