HEADLINE, SAÚDE

MS enkoraja PSF apoia atividade kuidadu saúde primaria iha área rurál

MS enkoraja PSF apoia atividade kuidadu saúde primaria iha área rurál

Pesoal Promotór Saúde Família (PSF) Covalima partisipa semináriu nasional ba Promotór Saúde Família (PSF) hodi bele suporta atividade komundiade kuidadu saúde primaria iha área rurais Timor-Leste. Iha salaun Delta Nova Dili, kinta (04/08). Imajen Tatoli/Francisco Sony

DILI, 04 agostu 2022 (TATOLI)— Vise Ministru Saúde, Bonifácio Maucoli dos Reis, husu ba Promotor Saúde Família (PSF) iha territóriu nasionál atu kontinua apoia pesoál saúde sira atu hala’o atividade kuidadu saúde primária iha área rurál.

Vise Ministru ne’e hato’o mensajen ne’e iha ámbitu semináriu nasionál ho tema “Revitalizasaun Promotor Saúde Família (PSF) Suporta Atividade Kuidadu Saúde Primaria iha Área Rurál-Timor-Leste”.

Objetivu hosi semináriu nasionál ne’e atu reforsa, revitaliza no reajusta Promotór Saúde Família nia kna’ar no responsabilidade hodi suporta profisionál saúde sira lori saúde besik ba populasaun iha área remota.

Iha tinan 2008, Govenu liuhosi Ministériu Saúde estabelese Promotór Saúde Família (PSF) nu’udar membru suku ne’ebé nomea hosi lider komunitáriu atu apoia programa SISCa iha sira nia suku.

Promotór Saúde Família ne’ebé rejistadu iha Ministériu Saúde no treinadu iha área saúde, hodi apoia progarama SISCa iha territóriu Timor-Leste hamutuk 4.450.

“Ita iha kompromisu atu reforsa, revitaliza no reajusta fila fali Promotór Saúde Família nia kna’ar no responsabilidade hodi suporta atividade kuidadu saúde primáriu iha área remota iha Timor-Leste ho prinsípiu katak lori atividade no programa saúde ba individu, uma-kain no komunidade hotu ba moris di’ak no saudavel liuhosi asisténsia saúde ne’ebé dignu, ekilibradu, adekuadu, universál, integrál no iha kontinuasaun,” Vise Minsitru Saúde hateten iha Delta-Nova, Comoro, kinta ne’e.

Inisiativa ba realizasaun semináriu ne’e, atu fo-orientasaun fali ba reestabelesimentu  Promotór Saúde Família hodi bele alkansa vizaun, misaun no objetivu katak saúde iha ema hotu nia liman, nune’e tenke iha envolvimentu ativu hosi entidade hotu.

“Programa ne’e hahú hosi koviksaun ida katak ita labele pasivu no labele hein de’it komunidade ba buka asisténsia saúde iha estabelesimentu saúde sira hanesan Sentru Saúde, Postu Saúde, Klínika, Maternidade maibé tenke pro-ativu hodi sai no lori kuidadu saúde hakbesik ba ema hotu,” Vise Maucoli hatutan.

Governu kria programa ne’e ho prinsípiu katak laiha ema ida maka hela iha kotuk no buka uluk sira ne’ebé mak hela liu ba kotuk ho kobertura saúde universál.

“Atu bele lori asisténsia saúde ba área remota presiza define no estabelese polítika ida-ne’ebé viavél no sustentavel ba komunidade nia saúde,” nia akresenta.

Alende, programa outreach no klínika móvel, iha tinan 2017, Ministériu Saúde lansa programa outreach hanaran SISCa (Serviço Integradu da Saúde komumnitária) no mós iha loron 22 jullu 2015 Governu ofisialmente lansa Programa Saúde na Família liuhusi vizita domisiliária ho objetivu atu lori saúde ba uma kain idak-idak iha Timor-Leste laran tomak hosi profisional saúde sira.

Planu Estratéjiku Nasionál Setór Saúde no Programa VIII Governu Konstitusional define no aborda estratéjia, programa, planu no kronograma ba ninia implementasaun, inklui Programa Saúde na Família.

Iha okaziaun ne’e, Ezekutivu ne’e bolu atensaun ba profisionál saúde sira hotu atu kontinua hala’o servisu ne’ebé diak liután ho matenek no espíritu étika no profisionalizmu, nasionalismu, prontidaun atu serbí, responsivu ba asuntu sensivél relasiona ho antendimentu saúde ba komunidade, maske hasoru dezafiu no difikuldade oin-oin.

Iha biban hanesan, Reprezentante Organizasaun Mundial Saúde iha Timor Leste, Arvind Marhur, hateten asisténsia Saúde Primaria, inklui prevensaun no promotivu saúde, rekonesidu ona nu’udar solusaun ba atinje kobertura saúde universál no nasaun hotu iha mundu komprimetidu atu oferese kobertura saúde universál ba populasaun hotu.

“Konseitu Promotór Saúde Família iha Timor-Leste ne’ebé  elabora iha 2008, ne’e hatudu exemplar visaun Ministériu  Saúde hodi oferese serbisu asisténsia saúde ba suku ne’ebé extremamente remota, to’o kedas komunidade nia odamatan oin,”Arvind Mathur dehan.

Entretantu, Diretór Servisu Saúde Munisipál Ermera, Joni Alves dos Santos, hateten promotór saúde familia la sufisiente iha munisípiu Ermera hodi apoia servisu profisionál saúde sira iha tereñu.

“Iha munisípiu Ermera pesoál promotor saude família uluk na’in-256, maibé agora hela de’it na’in-176 tanba kestaun orsamentu, nune’e la sufisiente ona hodi apoia serbisu saúde iha tereñu,” nia informa.

Nune’e, nia husu MS halo planu ida hodi aumenta tan promotor saúde família atu apoia serbisu saúde iha tereñu tanba kada tinan númeru populasaun aumenta.

Jornalista : Felicidade Ximenes

Editór      : Florencio Miranda Ximenes

iklan
iklan

Leave a Reply

iklan
error: Content is protected !!